Zu avanga harsatna tawk mekte chhanchhuahna hna thawk mek: Dr. Beichhua

Zoram thalaiten nasa takin Pro Fight an hlawkpui: Dr Beichhua 1

LUNGLEN BUREAU, 4th Oct, 2019
Vawiin khan AH&Vety Minister Dr. K. Beichhua leh Deputy Speaker Er. Lalrinawma ten Hmawngkawn khua an tlawh a, Community Hall-ah mipui vantlang tan inkhawm buatsaih a ni.

Dr. K. Beichhua chuan thu sawiin sawrkar thar chuan hmasawnna hna thawk turin theihtawpin tan a la mek a, kawng siam hna thawh mek niin, sawrkarin a ngaihpawimawh em em zu khapna dan siam nghal a ni bawk, a ti a. Zu avanga harsatna tawk mekte chhanchhuahna hna pawh ngawrh taka thawh niin Zu khap kawnga hma an laknaah mipui leh tlawmngaipawlte tawiawmna avangin lawmthu a sawi a. Ruihhlo ngaite enkawlna hmun Sethawna mi chu lian zawk leh changtlung zawka buatsaih turin Chief Minister-in cheng vaibelchhe sawm (10) a phalsak thu sawiin reilo teah hmalak a ni ang, a ti bawk. Dr K Beichhua chuan Hmawngkawn khua tlawh a chak chhan pakhat chu sial vulhtu khua an nih vang a ni tiin sial vulh kawngah hmasawn leh hlawk zawka an kal theihna turin hmalak a nih tur thu a sawi bawk.

Bialtu MLA Deputy Speaker Pu Lalrinawma pawhin thu sawiin Hmawngkawn khua chu khaw inlungrual leh sese awm lohna, khawdangte tan pawha entawntlak an nih thu a sawi a, hei hian hmasawnna pawh a thlen ngei a beisei tih sawiin sawrkarin SEDP hmanga hma a lakna turah pawh a hlawhtlinpuitu khua an nih theih nan ngaihtuahna an sen a ngai tih a sawi.

Hmawngkawn khua hi kum 1981 atangin sawrkarin sial vulhna hmun atan a ruahman a, in 35 awmna khuaah hian tun dinhmunah sial 106 vulh lai an nei a, ran ke na hri vangin sial 50 vel an thi. Kel vulh tumin hma an lak mek bawk a ni.

Hmawngkawn VCP Pu Lalchhingpuia’n vantlang inkhawm hi a kaihruai a. Khawtlang mipuiin an khaw mamawh Minister leh Deputy Speaker hnena an thlente chu a theih dan anga ngaihtuahsak an nih tur thu an lo hrilh a ni.

Share post:
avatar
  Subscribe  
Notify of