Zoram thalaiten nasa takin Pro Fight an hlawkpui: Dr Beichhua

Zoram thalaiten nasa takin Pro Fight an hlawkpui: Dr Beichhua

Zan hmasa berah knockout vawi khat, technical knockout vawi ruk.

Social Welfare Minister Dr K Beichhua chuan Mizo thalaite infiamna khawvel tukverha dak thei turin Pro Fight-in a siam lian tiin lawmthu a sawi.

Thawhlehni zanah R Dengthuama Indoor Stadium, Mualpuiah Tata Motors Yodha 4×5 Pickup LPS Pro Fight hawn a ni a, khuallian Dr Beichhua chuan “Mizo mipui ngaihhlut leh nghakhlel taka kan thlir” tiin a hun a thleng leh ta chu lawmawm a ti hle.

Pro Fight vawi sarih kalpui a ni tawh a, Dr Beichhua chuan : “Zoram thalaiten nasa takin an hlawkpui tih Zoram mipuiin an hria,” a ti a : “Zoram thalaite chherchhuakin khawvel mit hmuhah min pho chhuak,” a ti bawk.

“National leh international-ah Mizo boxer-ten hlawhtlinna an chang chho mek a, Pro Fight atanga bultan an ni. Eizawnna tha tak tak Pro Fight-in a siamsak bawk a, a ropui ka ti.

“Pro Fight hi khawvel boxing tukverh kan dah theihna a ni tih hria ila, Zoram mipuite pawhin hlut leh zual ila ka duh,” a ti.

Boxer-te fuihin : “Rilru nei tak, rilru thianghlim leh hrisel taka kan beih a tha a. Thalai ruihhloin a tihbuai mek chhanchhuah ngaite tan entawn tur, chhanchhuaktu ni turin ke pen ang u,” a ti.

Mi pawimawh dang sawi telin : “Sumdawngte an pen chhuak thin a, hlawkna lam aiin thalaite tan an insengso va, a hlawhtlin theih nan sum senga sponsorship titute chungah lawmthu ka sawi e,” a ti.

Joy Zairemmawia’n a kaihhruai a, Mizoram Boxing Association Medical Commission Chairman a nih laia chatuan ram pan ta Dr C Lallunghnema sun a ni a, May 8, 2018 khan khawvel a chhuahsan.

Rosie K Remsangpuii’n ‘Ro Min Relsak Ang Che’ tih hla a sak hnuin inhnekin a chhunzawm a, zan hmasa berah hian inhnek vawi 11 awmin knockout tum khat leh technical knockout vawi ruk a awm nghal a ni.

Zoram thalaiten nasa takin Pro Fight an hlawkpui: Dr Beichhua 1

RESULT

LIGHTFLY – bout 5

F Lalnunsanga (Saithah) bt Nelson HC Lalnunmawia (Zohnuai Lunglei)
= Technical Knockout (Round 3, second 45)

A tir atangin Saithah boxer F Lalnunsanga a chungnung a, inngam leh inhawng takin an innuai tawn. Round khatna tawp dawnah chiang zetin Nunsanga’n a bekah a vai fuh a, Nelson HC Lalnunmawia tluin referee C Vanlalchhuanga’n a chhiar a, a tho chhuak leh. Round hnihnaah Nunsanga’n a vei leh ding vai tawnin na tham takin vawi ruk a hnek zawn a, chhiar ngai khawpin awm leh mah se Nelson-a a ding chhuak leh tho a, beiseiawm takin a hneh let a, boruak a sang viau.
Mahse, round hnuhnung tir lamah Nunsanga’n na tham taka a hnek leh hnuin a vawi thum nan chhiar ngaiin Nelson-a a chiai a, Chhuanga’n inhnek titawpin technical knockout-in Nunsanga a chaktir. Inngam leh huaisen takin an inbei a, thawhlehni zana inhnek hmuhnawm ber a ni.

Lalrindika (Khawlailung) bt ZA Tlado (Laki)
= Technical Knockout (Round 2, munute 1:38)

An mikhual lo dun viau a, round hmasa berah inhnehtawk takin an innuai. Round hnihna laihawlah Lalrindika’n a ngilin a hnek fuh a, AZ Tlado chiaiin a chawl ringawt a, Eindika’n um zuiin Laki boxer Tlado hi a inhnukdawk.

Vardingliana (Chamring) bt Malsawmtluanga (Vairengte)
= Technical Knockout (Round 2, minute 1:13)

Chamring tlangval Vardingliana’n a thunun nghal a, chiang tak takin a hnek tam viau mai. Malsawmtluanga’n huaisen takin bei mah se a chhang let zo lo va, langsar takin a dak awrh awrh reng bawk nen round hnihnaah Sawmtluanga lam atangin towel an vawm lut a, technical knockout-in Dingliana a chak.

PL Lalchhanchhuaha (Saichal) bt Lalrokhawla (Lunglei)
= Technical Knockout (Round 1, second 30)

PL Lalchhanchhuaha’n a awpbet nghal a, Lalrokhawla boruak hap atangin referee B Lalhriatpuii chuan inkhan lo deuh tiin Chhanchhuaha a chaktir a, second 30 chiah an inbei hman a ni.

Thangkhanmunga (Sawleng) bt Laldinpuia (Zuangtui)
= Knockout (Round 1, minute 1:25)

Phiar phek tha tak Thangkhanmunga’n kawng engkimah Laldinpuia a hnuaichhiah a, hneh takin a nual nghal. Round khatna laihawlah a dulah na taka a hnek hnuin a hmaiah chiang zetin a tuihnih a, Dinpuia tluin referee Lalchhanhima Hnamte chuan a chhiar a, Zuangtui bxer a tho chhuak thei lo.

Zoram thalaiten nasa takin Pro Fight an hlawkpui: Dr Beichhua 2

BANTAM

Vanlalruatpuia (Saikhamakawn) bt Lalhnehzova (Kanghmun)
= Unanimous Decision (30-27, 30-27, 30-27)

Vanlalruatpuia’n thiamna a nei tha zawk tih a lantir a, a veiin Lalhnehzova a hneh fuh fo. Chiai khawpin siam thei bik lo mah se hnek dik leh awmze nei zawkin a khel tluan a, round tinin langsar thamin a chungnung vek.

Zoremsanga Royte (Mamit) bt Zidane Ramdinsanga (Nursery)
= Unanimous Decision (30-27, 30-27, 30-27)

A tirah ngam takin an innuai tawn a, an vai chhuak nasa hle. Round hnihna atangin Zoremsanga Royte chuan nuam ti takin a khel thei a, Zidane Ramdinsanga’n thiamna a tlachham deuh a, a tawp lamah Zoremsanga’n fuh tak takin a hnek a, Ramdinsanga a ding tluan hram.

Isak Rosangpuia (Lunglei) bt Lalremthanga (Sakawrdai)
= Technical Knockout (Round 2, minute 2:00)

Inhnehtawk takin an inbei nghal a, a tir lamah Sakawrdai boxer Lalremthanga a khawng hle. Mahse, Isak Rosangpuia’n tha takin a hnek let a, tlo takin a bei a, round hnihna tawp lamah Rosangpuia’n chiang taka a hnek hnuin Remthanga a talbuai a, referee Rochhingpuia’n chhiarin Sakawrdai tlangval a inhnukdawk zui ta a ni.

Lalruatfela (Edenthar) bt Lalchhandama (Nursery)
= Technical Knockout (Round 2, second 1)

Ngam takin an inbei tawn nghal a, hlimawm takin bul an tan. Hnek thiam leh ban sei zawk Lalruatfela’n awpbet hret hretin round khatna tawp lamah Lalchhandama a che buai hman hle. Round hnihna tan rualin Nursery boxer Chhandama a inhnuk dawk a, technical knockout-in Ruatfela a chak.

Zoram thalaiten nasa takin Pro Fight an hlawkpui: Dr Beichhua 3

LIGHT

Lalhruaisanga (Ramhlun North) bt Lalhmachhuana (Durtlang)
= Unanimous Decision (30-27, 30-27, 29-28)

An inhnek dun nghal bian bian a, thiamna an nei tha tawk lo ve ve. An thiam dan a inchen tawk viau a, Lalhruaisanga kut chhuak a langsar deuh zawk a, Lalhmachhuana’n bawh viau mah se awmzia a nei tam lo. Round hnihna atangin an tlahniam ve ve a, chau leh zawi takin hun tawp lam an hmang a, an inbei a hmunnawm zo lo.

PC Rosangpuia (Tlangnuam) bt David Lalremruata (Zemabawk North)
= Unanimous Decision (30-27, 30-27, 29-28)

Inveng tawn takin an inbei tluan a, PC Rosangpuia’n a hnek fuh leh zauh thin a, David Lalremruata’n thahrui nei tha viau mah se chet a harsat. An inbeih chhungin inhnek fuh langsar a tam lo hle a, Rosangpuia’n a ngilin tha taka hnek chang a nei a, Remruata’n a vai ve thung a, a hlawhtlinpui zo lo.


Tata Motor Yodha 4×4 Pickup LPS Pro Fight 2019

FIXTURE

Feb 7, Ningani 8:00pm – bout 12

LIGHTFLY – bout 5

Lalhmingmawia (Saithah) v KPA Samte (Teikhang)
Laltlanmawia (New Chalrang) v Ngursangzuala (West Phaileng)
Lalremkima (Saikhamakawn) v Lalhruaisanga (Sakawrdai)
Victor Lallianmawia (Vathuampui) v Lalruatsanga (Khawzawl)
Francis Lalrinngheta (Edenthar) v Lalnunfina (Bawngkawn)

BANTAM – bout 4

Lalnunpuia Varte (Ramhlun North) v VL Chhanchhuahkima (Sawleng)
J Lalsiammawia (Zotlang) v Malsawmdawnglina (Kawrte)
Nazareth Lalthazuala (Zemabawk) v (R Vanlaltanpuia (Edenthar)
Zairemmawia (East Lungdar) v Lalremmawia Darlawng (Phunchawng)

LIGHT – bout – 3

K Lalzirmawia (Chhingchhip) v Ricky Hmingthansanga (Luangmual)
Benjamin B Lalhmuliana (Hunthar) v Lalruatkima (Model Veng)
Lalhmangaihsanga (Khawzawl) v Moris Chawngthu (Lengpui)

Zoram thalaiten nasa takin Pro Fight an hlawkpui: Dr Beichhua 4

Share post:
avatar
  Subscribe  
Notify of