Zoram Sangliana’n a biala Bairabi khaw tuilakna tur a hawng

Zoram Sangliana'n a biala Bairabi khaw tuilakna tur a hawng

LUNGLEN BUREAU
Aizawl, October 3, 2018
Kolasib bialtu MLA P.C.Zoram Sangliana chuan vawiin khan a bial chhunga khua, Bairabiin tui an lakna tur, Bairabi Water Supply Scheme chu PHED Complex, Bairabi-ah a hawng.

Khuallian chuan Bairabi tui lakna hawn chuan khaw mipuite tan malsawmna a thlen a beisei thu sawiin tui lakna hmunhma chu tichhe theitu hrang hrang lakah vawnhim a pawimawh avangin neitu thinlung pua ram ngaw, nungcha leh tui hnate chu humhalh tlat turin kalkhawmte a chah.

Bialtu MLA chuan Bairabi chu ramri a awm a nih avangin state dang mite tlawhpawh tam a ni a, Mizo nun ze mawi vawng nung zel turin a chah a. Sorkar hmalakna hrang hrang hriatpuia tawiawm thintu khawtlang hruaitute leh MJA member te chungah lawmthu a sawi bawk.

Bairabi water supply scheme hi NLCPR sum, DoNER Ministry atanga Rs. Nuai 490.37 hmuh atanga siam a ni a, February, 2012-a thawh tan niin kum 2042 thlenga mi 9000 hnenah ni khatah tui litre 70 vel pe thei tura ruahman a ni.

Hawnna inkhawm hi Er. C.Lallunghnema, Chief Engineer, Zone 1, PHED-in a kaihruai a, Er. H.Lallianmawia, EE, Kolasib Watsan Division-in technical report a pe bawk.

Share post:
avatar
  Subscribe  
Notify of