Zirna hi engkima hma sawnna bul a ni : School Education Minister H.Rohluna

Zirna hi engkima hma sawnna bul a ni : School Education Minister H.Rohluna

LUNGLEN BUREAU
Aizawl, August 17, 2018
School Education Minister H.Rohluna chuan, “Zirna hi engkima hma sawnna bul a ni a, hnam din chhuah nan pawh zirnaa bul tan a ngai a, ngaihthah thiang a ni lo,” a ti.

Nimina Thingkaha Lawngtlai District Institute of Education & Training (DIET) building thar a hawnnaah H.Rohluna chuan thu sawiin zirna pawimawhzia a tar lang a, sorkar pawhin a ngaih pawimawh avangin zirtirtute zir leh chhawnna tur DIET building thar pawh district parukah hawn theiha sak peih tawh a nih thu a sawi.

DIET building thar hawnnaah hian Khualzahawm, School Education Department Commissioner & Secretary Esther Lal Ruatkimi, IRS pawhin nakina miin an chanchin an la sawi tur chu tunah an ziak mek tih sawiin, “Thawnthu ngaihnawm tak, mite zirtlak hnutchhiah turin kan nun kan uluk a, fimkhur taka hun kan hman a pawimawh,” a ti.

DIET Lawngtlai building thar lawmna inkhawm hi building thar classroom-ah hman a ni a. SCERT Director Laldawngliani Chawngthu chuan inlawmna thu sawiin a satu, PWD Project Sub-Division Lawngtlaia SDO Er Samuel Lalnunpuia’n technical report a pe.

DIET Lawngtlai hi kum 2005-2006 session khan District Resource Centre/Mini-DIET angin din a ni a. Kum 2012 atang khan DIET puitlinga hlan kai a ni. A building thar hi Rs Nuai 225 sengin square metre 890.23 awhin RCC structure chhawng 3-a sak a ni a. Room hrang hrang 11, lobby 2 leh toilet 10 a awm a. October 20, 2015-a sak tan a ni.

Building thar hawnnaah hian Minister hi a nupui Lalbiaknii leh Education Department-a officer pawimawhten an tawiawm a. LADC CEM T.Zakunga, Lawngtlai Bawrhsap N.Chakhai, MCS, LADC-a member, sorkar official-te leh mipui eng emaw zat an tel.

Share post:
avatar
  Subscribe  
Notify of