Zir chianna atanga vannei ber Manchester United

Zir chianna atanga vannei ber Manchester United

LUNGLEN SPORTS

ESPN, Intel leh University of Bath chuan ngun takin 2017-18 English Premier League an zir chiang a, a nih dan tur ang taka thutlukna siam loh leh thutlukna siam dik loh avanga thil danglam theih dan an tar lang tel nghal.

He zir chiannaah hian Premier League referee hlui Peter Walton pawh a tel a, Premier League team 20 zinga thutlukna dik lo vanneihpui nasa ber chu Manchester United an ni a, a nih dan tur ang takin thil kalpui se United hian an point hmuh atangin point ruk ngawt an hloh dawn niin an sawi.

Thutlukna dik lo avanga vanduai ber chu Liverpool an ni ve thung a, dik tawk lova thil kalpui a nih avangin point 12 ngawt an hloh niin an tar lang. A nihna ang takin thil kal se Liverpool hi pahnihna an ni daih dawn a ni, an ti bawk.

Vannei zingah champion Manchester City an tel a, thutlukna fuh lo avangin point thumin an hlawk phah. A dik takin thil kal se City hian point 100 ni lovin 97 an hmu dawn a, an champion tho ang. Vanduai zingah Arsenal telin dik tawk lo vangin point riat ngawt an hloh phah.

Vanduai em em chu Stoke City an ni a, thutlukna dik tawk lo an tawrh avangin 19-na an ni a, an tlak phah. Chuti ni lo se point li neih belhin 17-naah an awm ang a, an him chiah dawn. Hetih rual hian thutlukna fuh lo chhawrin Huddersfield an him phah ve thung niin an sawi.

Video atanga ngun taka inkhel an ennawn leh hnua tehna atana an hmante chu : Goal pawm loh ennawnin a dik ngei em tih an finfiah; goal reng si dik lo taka pawm a ni em tih an en; dik lo taka penalty pek atanga goal an thun; penalty ngei tur pek loh an nei em tih an en; red card chawina tura chawi loh a awm em; minute 90 hnua hun an pek belh tawp hnuah goal thun a awm em; tih leh dan piala goal-te an en a ni.

Langsar tak pakhat chu October 14, 2017 khan Anfield-ah Liverpool-in Manchester United an mikhual a, 0-0 in an inhnehtawk. Minute 63-ah United-in penalty chawi ngei ngei tur an nih laiin referee-in a ham lo va, chuti ni lo se 1-0 in Liverpool an chak tur a ni tiin an endik dan an tar lang. Hetah hian dik lo takin Liverpool-in point hnih an hloh laiin United-in point hnih an hlawh ve thung.

English Premier League table 17-18
(Table pangngai)

Manchester City 100
Manchester United 81
Tottenham 77
Liverpool 75
Chelsea 70
Arsenal 63
Burnley 54
Everton 49
Leicester 47
Newcastle 44
Crystal Palace 44
Bournemouth 44
West Ham 42
Watford 41
Brighton 40
Huddersfield 37
Southampton 36
Swansea 33
Stoke 33
West Brom 31

‘Luck Index’ simulated table 17-18
(Zir chian hnuah an point hmuh dan tur)

Manchester City 97
Liverpool 87
Tottenham 77
Manchester United 75
Arsenal 71
Chelsea 70
Burnley 50
Newcastle 48
Brighton 46
Everton 44
Crystal Palace 42
West Ham 41
Watford 41
Leicester 40
Southampton 40
Bournemouth 38
Stoke 37
Huddersfield 37
Swansea 34
West Brom 33

Share post:
avatar
  Subscribe  
Notify of