UCL : Red Star 2-0 Liverpool, Napoli 1-1 PSG

UCL : Red Star 2-0 Liverpool, Napoli 1-1 PSG

LUNGLEN SPORTS
Red Star Belgrade-in si hnih faiin an mikhual Liverpool an hneh a, beiseina an insiam. Thawhlehni zan Champions League inkhel dangah 1-1 in Napoli leh an mikhual PSG an inhnehtawk.

Kar hnih kal ta khan Anfield-ah Liverpool-in si li faiin Serbian champion an hneh tawh a, rin kai ni chungin feh chhuak mah se first half chhungin harsatna an tawk a, an insiam tha zui thei lo.

Mualneitu team-in inringtawk takin an khel a, chawlhlawk thlengin inkhel an thunun tha hle. Minute 22-ah Milan Pavkov chuan a tauh lut a, minute sarih hnuah amah vek hian kawh takin a pet lut leh a, Reds an talbuai hle.

First half chhungin Red Star-in goal khung theihna hun tha an ngah a, Vujadin Savic leh El Fardou Ben Nabouhane chuan an thun teuh hle bawk a ni.

Second half-ah Liverpool an insiam tha a, ball chang tamin an nawr nasa. Mahse, khawng takin Serbian champion-in goal an veng a, hun tawp thlengin Reds-in an su tlang zo lo.

Mohamed Salah chuan goal ban a pet per a, Liverpool-in goal khat tal thun tumin bei hle mah se an hlawhtling thei lo va, an group-a team nem bera ngaih laka an tlawm rualin an hma lam a derthawng zui nghal a ni.

Red Star tan hnehna hlu tak a ni ve thung a, Champions League kal meka vawi li an khelh tawhah an chak hmasak ber a ni a, point li hmuin an group-ah hniam ber ni zel mah se tlang thei turin beiseina an nei zui thei a ni.

Inkhel dangah Napoli-in French league kal meka an tumpui la hneh vek PSG an dang a, point khat thawk chhuakin an group-ah hma an hruai zui nghal.

Tualchhungah chungnung hle mah se PSG-in Europe-ah beisei angin an khel zo lo va, chak thei turin goal thun hmasa zawk mah se an venghim zo lo.

First half tawp hma chiahin Kylian Mbappe-a siamsak atangin left back Uan Bernat chuan mikhual tan a thun a, mahse, darkar khat an inkhelh hnuah PSG-in penalty an chawi.

Minute 62-ah tunlaia khel tha tak Lorenzo Insinia chuan Napoli si phurh sut nan a chhuih lut a, mualneitu team-in second half thunun zawkin Dries Mertens-a thun tur PSG goalkeeper Gianluigi Buffon chuan a dansak a, tha tak takin a dang nual bawk a ni.

Group C-ah Napoli leh Liverpool-in point ruk ve ve hmuin an pahniha an inkhelh tawhah Napoli an chak avangin an sang zawk a, pathumna PSG-in point nga hmuin Red Star aiin point khatin an sang a, khelh hnih theuh an la neihah team pali hi point hnih chiahin a daidan a ni.

Share post:
avatar
  Subscribe  
Notify of