Tripura atanga Bru lo kir, Kolasib-a chhungkaw 2 hnenah inremna angin tanpuina hlan

Tripura atanga Bru lo kir, Kolasib-a chhungkaw 2 hnenah inremna angin tanpuina hlan

LUNGLEN BUREAU
Aizawl, September 14, 2014
Ministry of Home Affairs (MHA), Mizoram sorkar, Tripura sorkar leh Mizoram Bru Displaced People’s Forum (MBDPF) ten inremna thutlung an ziah anga Tripura-a Bru relief camp atanga Mizoram mi Bru lo kir, Kolasib district chhunga Meidum khuaa chhungkaw hnih hnenah vawiin khan Kolasib Bawrhsap Dr. Arun T, IAS leh Denny Lalchhuanawma, MCS, SDC te chuan Bawrhsap pisaah inremna thuthlunga inziak angin tanpuina an hlan.

Bru chhungkaw hnih rawn lette hi chhungkaw aiawhin Lalnunfela leh Hriata (chhungkaw pa ber ve ve) ten tanpuina an dawng a, Bawrhsap bulah hian harsatna leh mamawh hrang hrang an neih – electric leh gas supply/connection chungchang te an thlen nghal a. Bawrhsap hian danin a phal chin leh inremna thutlung an ziahna hnuaia phal a nih chinah chuan puih a inhuam reng thu a hrilh.

Bru chhungkaw hnihte hi inremna thutlung zulzuiin kum 2 chhung atan fixed deposit turin Rs. Nuai 4 ve ve cheque hlan an ni a, Monthly Asisstance kum hnih chhung atan thla tin Rs. 5000/- pek an ni ang a, Housing Assistance atan Rs. 1,50,000/- phalsak an nih angin inremna thutlung zulzui thovin Rs. 25,000/- ve ve pek an ni tawh a, kum 2 chhung atan ration buhfai, puitling pakhatin ni khatah gram 600 leh naupang pakhatin ni khatah gram 300 an dawng dawn bawk a ni.

Bru chhungkaw hnih, Meidum khuaa rawn lette hi Mahesh Singla, IPS (Rtd) Adviser, Bru Repatriation, MHA chuan Inrinni khan an chenna hmun a lo tlawh tawh bawk.

Share post:
avatar
  Subscribe  
Notify of