Topo Sheet hmanga Mizoram-Assam ramri zir chian leh document hai chhuah tum

Topo Sheet hmanga Mizoram-Assam ramri zir chian leh document hai chhuah tum

LUNGLEN BUREAU
Aizawl, September 25, 2018
Assam leh Mizoram ramri chungchang ngaihtuahtu tura din committee sang, Core Committee chuan ramri tifel tur hian Topo sheets hmanga hun remchang hmasaah chiang zawka zir an tum a. Shillong leh Guwahati-a British hun lai atanga Assam leh Mizoram ramri chungchang inziahna document kimchang lakchhuah an tum bawk.

Mizoram leh Assam ramri chungchang ngaihtuahtu tur Core Committee hi nimin khan Chairman Lalnunmawia Chuaungo, Principal Secretary, Home Department room-ah a vawi khat nan an thukhawm a. Committee din hmasakin hma a lo lak tawhnate an thlirho va. August 9-18, 2018 chhung khan ramri hi Survey of India-in a rin chu a hmuna enfiah a ni tawh thu leh Survey of India-in ramri a siam hi ngaihruat rin mai a nihzia hmuhchhuah a nih thu sawi a ni a. Survey of India-in ramri a siam lai hian Mizoram sorkar emaw, Assam sorkar emaw a rawn lo va, ramri hrula chengte a kawmnaah ramri chungchang buaipui thawm a awm loh thu a sawi bawk tih sawi lan a ni.

Committee hian Assam leh Mizoram ramri chungchang hi Topo sheets hmanga hun remchang hmasaah chiang zawka zirchian leh nise an ti a. Hei bakah hian Shillong leh Guwahati-a British hun laia Assam leh Mizoram ramri chungchang inziahna document kimchang lakchhuah nise tiin a kaihhnawih document awm zawng zawng lakchhuah turin ruahmanna an siam a. Guwahati leh Shillong-a document duh ang a awm lo a nih pawhin National Archives leh Bengal Archives pawh dap zel ni se an ti bawk.

Mizoram leh Assam ramri chungchanga document duh angte hmuha hlawm fel a nih hunah Ministry nen sawihovin sorkar laipuia thlen tur a ni a, sorkar laipui kaihhruaina hnuaia Assam leh Mizoram sorkar nen ramri hi sawiho leh tur a ni ang.

Mizoram leh Assam ramri chungchang ngaihtuahtu tur committee sang hi Chief Minister Lal Thanhawla hovin din a ni a, hetah hian Lalbiakzama, Additional Secretary, Home Department chu Chairman a ni a. He committee hian MZP duh dan anga hma a lak loh avangin an inhnukdawk a. A hnuah Core Committee thar hlak hi Chief Minister puihnain din thar leh a ni.

Core Committee tharah hian Lalnunmawia Chuaungo, Principal Secretary, Home Department chu Chairman a ni a, Member-te chu Director, LR&S emaw, a aiawh; Lalthlamuana Pachuau, Conservator of Forest; F.Lalthanmawia, Archivist, Mizoram State Archives; Lalnunzira, DFO, Kolasib; President, MZP General Headquarters emaw, a aiawh leh Home Department-a helam changtu officer-te an ni.

Share post:
avatar
  Subscribe  
Notify of