Thla 6 chhungin High Risk Group 6,742 test zinga 238 te HIV positive

Thla 6 chhungin High Risk Group 6,742 test zinga 238 te HIV positive
LUNGLEN BUREAU
Aizawl, Oct. 31, 2018
Kumin chhunga MSACS hnuaia tum bik neia hmalakna, Targetted Intervention (TI) a thawktu NGO-te hnathawh dan thlirletna hun chu nimin khan Aizawl SP Conference Hall-ah neih a ni a. Tun thla 6 chhung (April-September) khan High Risk Group 6,742 test tawh an ni a, 238 positive hmuh chhuah tawh a ni tih tarlan a ni.
Mizorama drugs-a inchiu thinte bakah Hmeichhe inzuar thinte leh mipa, mahni anpui kawp thinte tana hmalakna Targetted Intervention (TI) project 32 MSACS hnuaia kalpui mek Project Director te puala Review Meeting-ah hian MSACS Project Director Dr. Lalmalsawmi Sailo chuan TI project a thawktu ten kan hnathawhna huamchhungah inchiu thin la register loh an la tam nia a lan avangin tan lak lehzual a ngai tih a sawi a. Lungdai khuaah Presbyterian kohhranin drugs a inchiu thinte tana a thlakna tur damdawi ei chi Oral Substitution Therapy semchhuahna hmun, OST Centre enkawl hna an kalpui mek chu Mizorama HIV darh zel tur venna kawnga kohhran leh khawtlang dangte tana entawn tlak a nih thu a sawi bawk.
Ni khat awh Review Meeting-ah hian 2018 kum chanve (April-September) chhhunga an hna thawh te en letna hun an hmang a. Hmalak leh zel dan tur an sawi ho bawk a ni. Mizoram ah hian TI Project hi 32 a awm a, NGO 24 in TI Project hi an kalpui mek a ni.
Hmalakna tur hrang hrang zingah HIV Test leh HIV+ve, ART la ei lo ten an ei ngei theih nana tan lak te hi a langsar zual a ni. Mizoram chhungah MSACS hnuaia TI Division leh Basic Service Division te tangkawp in TI zawng zawng ah awlsam zawka HIV test theihna, Community Based Screening (CBS) a awm vek tawhin, chak taka hmalak zel a ni. He test hmang hian tun thla 6 (April-September) chhung hian High Risk Group 6742 test tawh an ni a, 238 positive hmuh chhuah tawh ani.
Thla 6 Review hi Joint Director (TI) Betty Lalthantluangi leh Alan Lalmuanpuia, State TI Coordinator ten an enho pui a ni. Vawiinah TI Project Manager te nen 6 months Review Meeting hi NLUP Conference Hall ah neih leh a ni ang.
Share post:
avatar
  Subscribe  
Notify of