T.Sangkunga’n S.Khawbung, Zawlsei leh Khuangthing khua chawm tur, ni tin tui litre 38000 pump chhuak thei a hawng

T.Sangkunga'n S.Khawbung, Zawlsei leh Khuangthing khua chawm tur, ni tin tui litre 38000 pump chhuak thei a hawng

LUNGLEN BUREAU
Aizawl, September 25, 2018
DONER kaltlang, Non Lapseable Central Pool of Resources (NLCPR) sum Rs. Nuai 827.38 senga siam, South Khawbung Water Supply Scheme (pumping) chu vawiin chawhma khan East Tuipui bialtu MLA T.Sangkunga’n tui pump khawl hmet nungin a hawng a. He tui pump khawl thar hian ni tin tui litre 38000 pump chhuak theiin khaw pathum – S.Khawbung, Zawlsei leh Khuangthing khuate chawm tur a ni.

Khawbung Community Hall-a hawnna inkhawmah T.Sangkunga chuan thu sawiin Tui hna siamtu ramngaw chereu tak zel avanga tui harsatna a zual zel laia a bial chhunga lui pawimawh tak atanga tui lakna tha tak siam thar a ni chu chhinchhiah tlak a nih thu a sawi a. A bial chhunga hmalakna lian tak tak, NABARD sum Rs. Vbc 48 hmanga Tuipui-Dungtlang-Khuangleng-Dilkawn kawngpui pavement siam te, Khawbung khuaa Rs. Vbc 3.5 senga Mini Sports Complex sak mek leh Tlawva Mini Hydel Project siam mekte chu nakin lawka chhenfakawm tak tur a nih thu a sawi a. BADP sum leh NEDP sum hmanga hna tam tak thawh a nih thu sawiin, Khawbung PHE SDO Qtrs sakna tur Rs. Nuai 24.5 pawh dah fel a nih thu a sawi a bawk.

Hawnna inkhawm hi Er. H.B.Chakma, SE, PHED, Champhai WATSAN Circle-in a kaihruai a. Er. J.Kapkima’n Technical report a pe a. F.Vanlalriana, VCP, Khawbung; Er. K.Lalhmingliana, Sr. EE, Nodal Officer, SBM (G) leh Er. J.Lalhmachhuana, EE, P&E, Champhai WATSAN Division ten thu an sawi bawk.

South Khawbung WSS hi khua atanga Aizawl Road kilometer 17-a hla, khawchhak Tuipui kama awm niin tui lakna hnar ber chu Tuipui a ni a. Kum 2012 atanga thawh tan niin kum 2013-ah commission niin kum 2018-ah hawn theiha peihfel a ni a. Tuilakna thar hian S.Khawbung, Zawlsei leh Khuangthing khuate a chawm thei dawn a, ni tin tui litre 38000 pump chhuak thei tura beisei a ni a, electrict khawl 500 KVA leh Diesel Generating Set 500 KVA bunfel a ni bawk.

Khawbung WSS atanga khua thleng tur hian tui pipe lian kilometre 11-a thui vuah niin Total head hi metre 957-a sang a ni a. Design ang chuan kum 2044 thlenga ni khata darkar 22 tui pump thei tur leh a chawm khuate hneh taka tui pe thei tur, mi pakhat zel ni tin tui litre 70 pe thei tura ruahman a ni a. Tui dahkhawlna tur tanky lian litre nuai 1.5 dawng khaw chhungah siam niin heta tang hian public point leh private connection-ah sem a ni ang.

Hawnna hunah hian Er. Lalmuanzova, MES, Engineer-in-Chief, PHED, PHED hotute, P&E hotute, sawrkar official leh Khawbung leh a chhehvel khua a khawtlang hruaitu leh mipuite an tel a ni.

Share post:
avatar
  Subscribe  
Notify of