Sports Minister-in Lawngtlaia CYLA khelmuala phullem phah thar a hawng

Sports Minister-in Lawngtlaia CYLA khelmuala phullem phah thar a hawng

LUNGLEN BUREAU
Aizawl, September 7, 2018
Mizoram State Sports Council (MSSC) hnuaia Lawngtlaia Central YLA khelmuala phullem (synthetic turf) phah chu vawiin khan Sports & Youth Services Minister, MSSC President ni bawk, Zodintluanga chuan inkhelh nana hman theih turin a hawng.

CYLA khelmuala phullem phah thar hawnna inkhawmah hian Zodintluanga chuan Lawngtlaia phullem phah chu district mipuite tan thil chhinchhiahtlak nia a hriat thu sawiin, “Phullem phah thar avang hian hun rei loteah chuan Lawngtlai atang hian footballer tha an la chhuak sup sup dawn,” a ti a. Mizo naupangte talent hai chhuak turin a tul chuan coach pawh an pek theih tur thu a sawi bawk.

Zodintluanga chuan India ram leh khawvelah pawh Mizo chu football-ah an lang ta fo chu lawmawm a tih thu leh football turf tam tak enkawl uluk loh avanga hma taka chhe ta mai a awm thin thu a sawi a, enkawl dan dika enkawl chuan kum 20 daih tur chu neitu nihna nen uluk taka enkawl turin CYLA, DFA leh mipuite a chah nghal.

Khuallian hian Lawngtlai harsatna ber tui harsatna su kiang tura hma lakna Greater Lawngtlai WSS chu fur tui lianin Tuipui pump intake a chim avangin khua a thal veleh siam thain hawn a nih tur thu a sawi a. UD&PA hnuaiah Lawngtlaia in sa thei lo chhungkaw 500 in sakna tur tifelin, 200 chuan bul an tan tawh thu a sawi a. Chhungkaw 2000 in sakna tur pawh sawrkar laipuiin pawm tawhin, tun atanga rei lo teah pek chhuah a nih tur thu a sawi bawk.

Khual zahawm, AH & Vety Minister C.Ngunlianchunga chuan Mizoram sorkarin Lawngtlai district mipuite thil ropui tak min tihsak tih sawiin a hlawhtlinna tur erawh chu district chhung thalaite kutah a innghat tih a sawi a. Khual zahawm dang, Lawngtlai East bialtu MLA H.Zothangliana pawhin phullem phah thar leh Lawngtlaia sorkar hma lakna thar tam tak awm chu sorkarin Lawngtlai mipui a duhsakzia tilangtu a nih thu leh a duhsaktute hriat reng leh lawm nachang hriat chu mipuite bat a nih thu a sawi.

Phullem phah thar hawnna hunah hian Lai Autonomous District Council-a Chief Executive Member Pu T. Zakunga pawhin thu a sawi a. MSSC Asst Engineer James Lalramnghaka’n phullem phah hna kalpui dan a sawi bawk.

YLA khelmuala synthetic football turf phah tur hian kum 2017-2018 khan Ministry of Youth Affairs & Sports – Khelo India Scheme hnuai atangin Rs Nuai 450 hmuh a ni a. Turf phah hna hi Lushai Engineers, Ramhlun, Aizawl chuan thawkin, May 26, 2017 khan thawk tanin, August 24, 2018 khan an zo va. Turf phah zau zawng hi a dung metre 110 leh a vang metre 74 a ni a. Football line hi permanent marking-a rin niin, a dung metre 105 leh a vang metre 69-a zau a ni a. Security fencing fit 7-a sanga hung a ni. An synthetic football turf phah hi Xtreme TurfD60 niin, FIFA approved company Act Global USA siam a ni.

Phullem phah thar lawm nan hian CEM team leh CYLA team-in exhibition football match an khel nghal a. Phullem phah thar hi MSSC chuan CYLA kutah a enkawl mawhphurhna a hlan nghal bawk.

Share post:
avatar
  Subscribe  
Notify of