Sorkar laipuiah helicopter service dil belh mek

Sorkar laipuiah helicopter service dil belh mek

LUNGLEN BUREAU
Aizawl, October 3, 2018
August, 2012 atanga Mizoram chhunga service-tir tan, helicopter chuan mipui mamawh a phuhruk zawh loh avangin sorkar laipuiah dil belh mek a nih thu I&PR Minister Lal Thanzara chuan a sawi.

Vawiin chawhnua Khuangleng khuaa helicopter tum hmun tur, helipad thar a hawnnaah Lal Thanzara chuan helicopter hi district hrang hrang leh khaw pawimawh zual biakahte servicetir anih thu sawiin, “Duh angin mipui mamawh kan phuhruk zaw loh avangin sorkar laipuiah dil belh leh mek a ni,” a ti a. Helicopter service chu hlâwkna ûma kalpui ni lovin mipui rawngbawlna atana kalpui a nih thu leh rîkrum thilah leh damlo na zual, nun chhan hmanhmawhthlakte tana tangkai tak a nih thu a sawi bawk.

Khuanglenga tumhmun siam a nih chungchangah Minister chuan, “A khaw chhehvelte tan lawi len a remchan avangin helipad hi siam a ni,” a ti a. Khawtlang tana ro tling, rikrum thil leh damlo serious tak takte tan bakah a mamawhtu mipuite tana malsawmna ropui tak a nih thu leh enkawl leh venhim kawngah neitu thinlung pu thin turin a chah bawk.

East Tuipui bialtu MLA, T.Sangkunga pawhin a bial chhunga civil helipad hmasa ber hawn a ni ta chu lawmawm a tih thu a sawi a. A bial chhunga PMGSY hmanga inkalpawhna kawng tam tak tihhlawhtlin leh sanction a nih theihna leh eng lama intodelhna tura Power Sub Station thar 3 hawn a nih theihna tura Lal Thanzara puihnaah leh helipad hawng tura a hun a sennaah bial aiawhin lawmthu a sawi bawk.

Helipad hawnna inkhawm neih dawnah Mizoram-a service mek, Pawan Hans Helicopter hi helipad-ah hian Minister leh a tawiawmtute phurin a tum a. Khuangleng khawtlang mipuite leh sorkar mi pawimawhten lo an hmuak a. Khuangleng hi Aizawl atangin minute 25 vel thlawk a ni.

Hawnna inkhawm hi Vanlaldina, Vice President, Khuangleng VC-in a kaihruai a, Minister hi T.Sangkunga, East Tuipui bialtu MLA bakah Lalramliana, Engineer-in-Chief, P&E; Lalnunmawii, IPRO; Abraham Beirazi Khithie, SDO (S), Champhai leh Dr. Lallawmkima, DIPRO Champhai-ten an tawiawm.

Share post:
avatar
  Subscribe  
Notify of