Siaha khawpuia hotel, thingpui dawrte ei in thianghlimna kawngah inel dawn

Siaha khawpuia hotel, thingpui dawrte ei in thianghlimna kawngah inel dawn

LUNGLEN BUREAU
Aizawl, August 17, 2018
NEFP hnuaiah Food & Drugs Administration, Health Department, Siaha district hmalaknaa Siaha khawpui chhunga VCP leh Secretary te, MCHP Gen. Hqrs hruaituten an khawpui chhunga ei leh in thianghlimna chungchang an sawihonaah an khawpui chhunga hotel, restaurant, thingpui dawr etc. te chu inelna siamsak ni se an ti.

Vawiin khan DIC Conference Hall-ah NEFP hnuaiah Food & Drugs Administration, Health Department, Siaha district hian Siaha khawpui chhunga VCP leh Secretary te, MCHP Gen. Hqrs hruaitute hi ei leh in thianghlim chungchangah leh damdawi hman sual chungchangah Training for trainers cum Drugs Awareness Campaign a neihpui a. Trainer-ten zirtirna an pek bakah zau takin ei leh in thianghlimna chungchang leh damdawi hman sual tihnep dan turte an sawiho nghal a ni.

An sawihonaah hian an khawpui chhunga hotel, restaurant, tea stall etc zingah criteria siamin inelna neih ni se, lawmman pawh siam ni se tiin an rel a. Sorkar, VC leh tlawmngai pawlten a huhova an fan leh endik dan tur pawh an sawiho bawk.

An ruahman dan chuan VC-te hian an huam chhunga hotel, tea stall leh restaurant awmte chu F&D, Health Department-ah a rang thei angin an thlen ang a, anni hian thianghlimna chungchangah training an pe dawn a. F&D hian thianghlimna chungchangah mipuite hriat tur pawimawh leh zirtirna pawimawh tarlanna (signage) pawh hotel, restaurant leh thingpui dawr hmun langsar laia tar tur pawh a pe chhuak dawn a ni.

Heng bakah hian kawngsir leh bazara nilenga sa zuarten tho leh vaivut laka thianghlim taka an sa an zawrh theih nan sa bawm (meat showcase) pek vek tur an nih tur thu R.Vanlalruata, Asst. Director, F&D chuan a sawi bawk.
Vawiina training leh sawihona hi Dr. Lalparliani, CMO, Siaha district-in kaihruaiin R.Vanlalruata, Assistant Director (F&D), Siaha & Lawngtlai district-in ei leh in thianghlim pawimawhna leh thianghlimna tur zirtirna a pe a ni.

Share post:
avatar
  Subscribe  
Notify of