SIAHA-AH DIET BUILDING THAR: A thar sak 6 zinga a hla ber peih hma ber

SIAHA-AH DIET BUILDING THAR: A thar sak 6 zinga a hla ber peih hma ber

LUNGLEN BUREAU
Aizawl, August 16, 2018
Rs. Nuai Rs.244.85 senga sak, DIET (District Institute of Education & Training), Siaha Building thar chu vawiin chawhma khan School Education Minister Pu H.Rohluna chuan a hawng a, he building hi DIET building thar 6 sak zingah a hla ber a ni nghe nghe.

Khuallian Minister H.Rohluna chuan DIET building thar 6 sak zingah a hla ber, DIET Siaha hawn hmasak ber a nih leh a hawngtua atang chu lawmawm a tih thu sawiin hmarchhak state zinga Mizoram DIET-ah chiah B.Ed zirna a la awm thu a sawi a. SCERT hnuaiah hnuaiah hmarchhak state dangten an neih loh, pianphunga rualbanlote tan pawhin B.Ed Special Course zirna a awm thu a sawi bawk.

Heng thil hi zirna lama Mizoramin hma a sawn tawhzia lanna pakhat a nih thu sawiin, “Education-a hma kan sawn theih nan zirlai naupang leh nu leh pa an pawimawh rualin, a pawimawh ber chu zirtirtute an ni,” a ti a. Zirtirtute tuaitharna leh tahhriamna tur hmunpui building thar hawn chuan trainee leh faculty member-te rilruah zirna tihhmasawn leh a standard tisang tura phurna, inpumpekna leh chona thar pe sela a duh thu a sawi bawk.

Minister chuan Siaha district-in sorkar ni pawimawh, Independence Day leh Republic Day lawmnaa hman tur Pipe Band a nei lo chu a vei hle tih sawiin Aizawl a thlen ve leh bawhzuia nakum Republic Day-ah hman ve ngei theih a beisei thu a sawi bawk.

Khualzahawm Esther Lalruatkimi, Commissioner & Secretary, School Education Dept pawhin thu sawiin, ram leh hnam himna, dinchhuahna leh hmasawnna hi Education-ah a awm tih hi hre reng turin DIET Siaha Faculty member leh Trainee te a chah.

DIET building thar hawn tak hi chhawng thum niin a puma a zau zawng hi 846.54sqm a ni. Ground floor-ah Class room (mi 54 leng), Computer Lab, Principal Room leh Establishment room; 1st floor-ah Class room, Resource Centre leh Faculty room; 2nd floor-ah Class room, Science Lab leh Library te a awm.

Building thar hawnnaah hian Minister hi a nupui, Lalbiaknii bakah School Education-a official te leh SCERT-a official thahnem takin Aizawl atangin an tawiawm a. Siaha atangin N.Zakhai, CEM, MADC leh a thawhpui EM leh officer te, Minister hlui leh MDCC President S.Hiato, Rev. Dr. Lai-u Fachhai, ECM Sr.Executive Secretary, Head of Office leh sawm bik thahnem an tel.

Minister hian DIET Siaha building a hawn hriatreng nan DIET building kawtah thingtiak a phun nghal bawk.

Share post:
avatar
  Subscribe  
Notify of