SERCHHIP DISTRICT E-ROLL 2018: Vote nei mi 49,283 zingah hmeichhia 25,054

SERCHHIP DISTRICT E-ROLL 2018: Vote nei mi 49,283 zingah hmeichhia 25,054

LUNGLEN BUREAU
Aizawl, September 27, 2018
Serchhip District Election Officer Sangchhin Chinzah chuan vawiin khan a pisaah Special Summary Revision of Electoral Roll 2018 Final Publication chu a tlangzarh a. He Roll thar-a a lan dan chuan an district pumah vote nei mi 49,283 awmin heng zinga 25,054 chu hmeichhia an ni.

Sangchin Chinzah hian electoral roll thar copy chu political party hrang hrang aiawhte hnenah a hlan nghal a. A tlangzarhnaah roll thianghlim leh dik an neih theih nan thawktuten an bei nasa a, sawisel kai miah lo khawp chuan an fel tawk lo mai thei chungin Final Roll 2018 hi an chhuang hle tih a sawi a. Rilru thianghlim taka thawktuten an buatsaih ang ngeiin political party-te pawhin rilru thianghlim tak pua hmang tangkai tura a duh thu a sawi bawk.

Final Roll, 2018-a a lan dan chuan Serchhip district pumah voter 49,283 awmin an zinga 313 chu Service voters an ni a. General voter (service voter ni lo) 48,970 awmin heng zinga 25,054 chu hmeichhia an ni a, mipa chu 23,916 an ni.
Serchhip bialah Polling Station 23 awmin voters 17,941 an awm a, an zinga 9,429 chu hmeichhia niin mipa 8,512 an awm a. Polling Station zingah Neihlohah voter tlem berin mi 205 an awm a, Thenzawl IV-ah voter tam berin mi 1,331 an awm thung.

Tuikum bialah Polling Station 29 awmin voter 15,486 an awm a, an zinga 7,790 chu hmeichhia niin mipa 7,696 an awm a. Vanchengte Polling Station-ah voter tlem berin mi 83 an awm a, Chhingchhip I-ah tam berin mi 1,014 an awm thung.

Hrangturzo bialah Polling Station 25 awmin voter 15,543 an ni a, an zinga 7835 chu hmeichhia niin mipa 7,708 an awm thung a. Polling Station zingah Bawktlangah voter tlem berin mi 215 an awm a, North Vanlaiphai I-ah voter tam berin mi 1,025 an awm.

Vawiina Final Roll tlangzarhnaah hian political party hrang hrang aiawh, tlawmngai pawl aiawh leh MJA bakah Electoral Roll revision lama mawhphurtu officer hrang hrangte an tel hlawm a. Election Commission of India ruahman angin siam that ngai awm apiang siam that theihna hun (continuous updation) neih zui leh tur a ni.

Share post:
avatar
  Subscribe  
Notify of