SERCHHIP COLLEGE BUILDING THAR: Lehkhathiam tam viau mah ila hmantlak leh chhawrtlak tam zawk nei tura hmalak a tul

SERCHHIP COLLEGE BUILDING THAR: Lehkhathiam tam viau mah ila hmantlak leh chhawrtlak tam zawk nei tura hmalak a tul

LUNGLEN BUREAU
Aizawl, September 25, 2018
Chief Minister Lal Thanhawla chuan vawiin khan Govt. Serchhip College Academic Building thar, RUSA (Rashtriya Uchchattar Shiksha Abhiyan) hnuaia sak chu a hawng a. Thu sawiin Mizoramah lehkhathiam tam viah mah sela hmantlak leh chhawrtlak ni tura tan lak zel a tul thu a sawi.

Chief Minister chuan tum mumal tak neia mahni tum tihlawhtling tura taimakna leh tumruhna pai tel a tul thu a sawi a. All India Service lama an kal loh chuan thalaite tan state chhungah chuan sorkar hna a tlem tawh thu sawiin, hei vang hian lehkhathiam leh mahni tuina bik leh thiamna bika kal duh tan te, entrepreneurship lama tui tante Capacity Development leh Entrepreneurship Development Scheme kalpui mek a nih thu leh thalai eng emaw zah an pen chhuah tawh thu a sawi.

Lal Thanhawla chuan khawvel ram changkang apiangin hriselna inenkawlna (health care) leh zirna (education) an ngaih pawimawh thin thu leh India ramah pawh tun hnaiah hengah hian hmalakna thar tha tak tak siam a nih thu a sawi a. Mizoram pawhin hman atang tawha zirna tihhmasawn leh state dangte el pha tura education reforms siam tura ruahmanna a lo siam tawh thu sawiin thalaite tana khawvel thar siam tura sorkar hmalak dante a sawi bawk.

Chief Minister tawiawmtu, School Education Minister H.Rohluna pawhin thu sawiin sorkarin zirna lama nasa taka hma lain infrastructure development lamah te, syllabus leh reading material te, facilities changkang thei ang ber te ngaihtuah a hma a lak thu a sawi a. Zirna chu a hniam ber atanga a sang ber thlenga ram hmasawnna atan pawimawh ber zinga mi a nih avangin ngaihthah chi loh a nih thu a sawi a, zir chhuak tawhte pawh hna an hmuh theih nan skill development-ah te, entrepreneurship development-ah te man tlem te-a zirtirna pek zel a nih thu a sawi.

Serchhip College building thar hawn tak hi RUSA Phase I hnuaiah 2013 kum tawp lam atang khan Serchhip College tihhmasawnna tura hmalak tan niin, Mizoram Technocrats Company chuan Academic Building sakna tur ruahmanna an siam a. July 2015 khan installment hmasa ber (Rs. 12,50,000) hmangin ground floor sak a ni a. April 2016-ah installment pahnihna (Rs. 93,75,000) hmangin classroom pahnih leh mipa leh hmeichhe inthiarna sak a ni a, April 2017 khan heng luah nghal a ni a. Installment pathumna (Rs. 93,74,952) hmangin vertical extension siam a ni a, classroom pahnih sak belh leh a nih bakah Multipurpose Hall chei that nan hman a ni.

Building hi metre 27.5×10.8-a zau a ni a, kumin June thla khan zawh fel a ni a. Tunah hian RUSA phase II kalpui leh mek niin Library Extension te, Seminar Hall leh academic building thar sak hna thawh leh mek a ni bawk.

Building thar lawmna inkhawm, H.D.Rosanga Multipurpose Hall-a buatsaihah hian Dr. Lalrintluanga Sailo, Institutional Co-ordinator, RUSA-in Technical Report a pe a. Pu Thanglura, Addl. State Project Director, RUSA-in thu a sawi bawk.

Inkhawmah hian School Education Commissioner Esther Lalruatkimi, Serchhip DC Sangchin Chinzah, SP R.Sathiyasundaram leh Serchhip district office hotulu hrang hrangte bakah khawtlang leh tlawmngai pawl hruaitute an tel.

Share post:
avatar
  Subscribe  
Notify of