Rohit-a century nen India-in T20 series la

Rohit-a century nen India-in T20 series la

LUNGLEN SPORTS
India captain Rohit Sharma chuan T20 International century siamin thawhlehniah India-in run 71-in mikhual West Indies a hneh a, series a la fel nghal.

Thawk hmasa India tan Rohit-an run 116 siamin ball 61 a hmachhawn a, T20 International century siam ngun ber ni nghalin a vawi li nan a puitlin a, over 20-ah mualneitu team-in run 195 siamin wicket hnih an hloh a ni.

Windies-in chak turin 196 mamawh mah se 124 chiah tlinin wicket kua an hloh va, India bowler Bhuvneshwar Kumar, Jasprit Bumrah, Khaleel Ahmed leh Kuldeep Yadav chuan wicket hnih theuh an la a ni.

Mi malin Rohit-a tan inkhel pawimawh leh hlu tak a ni a, four vawi riat hlapin six tum sarih a hlap bawk a, ball 58 a hmachhawn atangin century a siam hman a ni.

Rohit hian Twenty20 International-ah run 2,203 siam tawhin Indian zinga siam tam ber niin Virat Kohli a khum a, khawvelah siam hnem ber dawttu ni mekin run 2,271 siam tawh New Zealand batsman Martin Guptill chiah phak loh a nei a ni.

T20 International vawi thum an khelh turah India-in khelh hnih hnehna a chan zawnna a ni a, um phak theih lovin series-ah 2-0 in hma a hruai zui nghal a ni.

India-in series a lak zawn vawi sarihna a ni a, Windies erawh che chhe zui zelin thla hnih chhung India-ah an cham tawh a, Test series-ah 0-2 in an tlawm a, ODI series-ah 1-3 in an tlawm tawh bawk a ni.

Share post:
avatar
  Subscribe  
Notify of