Reilo teah kan bial kawngte hi a tha chho vek dawn : Hrangturzo bialtu OP-i

Reilo teah kan bial kawngte hi a tha chho vek dawn : Hrangturzo bialtu OP-i

LUNGLEN BUREAU
Aizawl, September 27, 2018
Hrangturzo bialtu MLA, Vanlalawmpuii Chawngthu, Minister of State ni bawk chuan a bial chhunga inkalpawhna kawngpui siam that hna chu thawh tan a nih tawh thu sawiin, “Reilo teah kan bial kawngte hi a tha chho vek dawn a ni,” a ti.

Vanlalawmpuii Chawngthu hian a bial chhung, North Vanlaiphai khuaiin kum 2019 YMA General Conference an thlen turah Organising Commitee chu meeting a neihpuiah he thu hi sawiin an khuain YMA General Conference a dawng tur chu lawmawm a tih thu sawi a. “Palai lokal khawmte chu felfai taka kan lo dawnsawna engkim tha leh tlin taka kalpui a nih theih nan kan tih tur theuhte kan hlen chhuah a ngai dawn,” a ti a, “Chung hna chu kan lo thawk tan dawn a ni,” a ti bawk.

Bialtu MLA hian North Vanlaiphai Joint MHIP Conference chu khuallian niin a hmanpui bawk a. Mizoten pawl intodelh leh tanpui ngaite tanpui thintu pawl ropui Mizo hmeichhiate intel khawmna, MHIP an nei chu vannei a tih thu sawiin, “Ram leh khawtlang hruai turin mipaten min pawm chhoh deuh deuh theih nan hmantlak leh rintlak ni tura kan inbuatsaih deuh deuh a tul a ni,” a ti.

MHIP Joint Conference hi R.L.Hmangaihzuali, an pawl President-in kaihruaiin Saipuii Sailo, President, MHIP Headquarters leh Dr. Thanpuii, Fin. Secretary, MHIP Headquarter ten an hmanpui bawk.

Share post:
avatar
  Subscribe  
Notify of