REIEK-AH AIENG SAWNGBAWLNA: Mipui an tan thiam phawt chuan theihtawp chhuahpui turin sorkar a inpeih reng

REIEK-AH AIENG SAWNGBAWLNA: Mipui an tan thiam phawt chuan theihtawp chhuahpui turin sorkar a inpeih reng

LUNGLEN BUREAU
Aizawl, September 28, 2018
Mission for Organic Value Chain Development (MOVCD-NER) kaltlanga hmalakna chi khat, Mission Organic Mizoram (MOM) hnuaia Reiek Block Turmeric Growers’ Society Processing Unit thar tur lung chu nimin khan Finance Minister Lalsawta’n a phum a. Thu sawiin, “Mipui lam an tan thiam phawt chuan sorkar lam chu theihtawp chhuahpui turin a inpeih reng a ni,” a ti.

Lungphum phum puala inkhawmah khuallian chuan Reiek, Ailawng leh Khawrihnim khuaa kuthnathawktute chu tangrual thiam tak an nih leh thawhhona tha tak an nei thei chu a lawmawm a tih thu a sawi a. Mizo mipuiten political party leh sorkar an sawi chhiat ang em ema a chhiat loh thu leh mahni infak ang em em tumah an that bik loh thu sawiin, “Mipui lam an tan thiam phawt chuan sorkar lam chuan theihtawp chhuahpui turin a inpeih reng a ni,” a ti.

Finance Minister chuan Mizorama lo neitu/kut hnathawktute chu an dehchhuah atanga sumdawnna lian nei turin an thar chhuah a tam tham tur a nih thu sawiin a huhova thlai chin ‘contract farming’ pawh uar deuh deuh a tul a rin thu a sawi a. Mi hausate pawhin agriculture leh thlai leh ran vulh lamah an sum peipun (invest) tam deuh se, tun aiin sumdawnna kalpui tam zawk se a duh thu a sawi bawk.

He hun hmanpuitu, bialtu MLA Lalrobiaka pawhin thu sawiin hnam leh mi mal ang pawhin intodelhna tel lo chuan zahawmna a awm theih loh thu a sawi a. Mizoram thlai thar chhuah zingah aieng leh hmarchaah nasa taka tan lak a nih thu leh state pawn atang pawhin ngaihven a hlawh hle tawh tih a sawi.

Principal Secretary Lalnunmawia Chuaungo chuan Reiek atanga aieng hralh tura siam chhuah chu ‘organic certification’ a neih zel a pawimawh dawn tih sawiin certificate pek an nih hmain thlai/hlo tur ‘pesticides’ hmang chu an test vek dawn avangin fimkhur turin a chingtute a chah.

Agriculture Secretary Lalhmingthanga pawhin thu sawiin Mission for Organic Value Chain Development (MOVCD-NER) hnuaia Mizoram chhunga hmalakna hrang hrangte a tarlang a. ‘Mission Organic Mizoram’ (MOM) dinin Reiek leh West Phaileng-ah ‘Organic Youth Club’ din a ni bawk tih a sawi a. Mizoramah MOVCD-NER kaltlangin Farmers & Producers Organisation (FPO) 14 din a ni tawh a, ram hectare 6117 enkawlin farmer 7972 hnenah tanpuina chi hrang hrang pek mek a ni tih a tarlang.

MOM hnuaiah hian thil hrang hrang 7 – aieng (turmeric powder), thingpui fe (organic tea), hmarcha um (Traditional Mizo Chilli Pickle), hmarcha hmui (Mizo Chilli Roasted & Crushed), sawhthing powder (Ginger Powder), sawhthing hmui (Ginger Flakes) leh aieng atang siam ‘Turmeric Dried Finger’ te an ni tih a sawi bawk.

Share post:
avatar
  Subscribe  
Notify of