Rebecca Saimawii : Hnuk ulh teuhin ka hnial a lo ngai ta a…

Rebecca Saimawii : Hnuk ulh teuhin ka hnial a lo ngai ta a...

A chiang ta! Hun rei tak an inrinsiak karah leh zawhna tam tak a dawn hnuah, Rebecca Saimawii chuan Mizo Idol judge ‘seat’ a luah loh tur thu a rawn nemnghet ta.

Kumin hian Mizo Idol neih tan a nih dawn thu puanzar a nih atanga tun tha tir thleng khan Mizo Idol judge thin Rebecca Saimawii-ah hian zawhna tam tak a awm nghal a. Mizo hmeichhe zinga Mizo Idol judge hmasa ber pawh hian social media-ah judge a nih laia an thlalak te a khat tawka a share thin chuan hriatchian a ti chakawm thei hle.

Rebecca Saimawii hian a Instagram account ah chuan ‘Let’s just talk…’ tiin a story-a ‘Question’ section chu a rawn set a. A follower tam takin thil chi hrang hrang an sawi pui bakah, zawhna a dawng nual a. Zawhna a dawn zingah chuan Mizo Idol judge tur chungchang a dawng tam malh malh hle.

A follower hnen atanga zawhna pakhat a dawn chu, “Audition zawhah ka hman/Pathianin rem a tih chuan Zonet min sawmna angin ka rawn thu ang!” tiin a chhang a. A inngaihtuah mek thu leh fitness personal trainer a buaipui mek nena a insutbuai dawn loh chuan judge-ah a tang leh mai thei tiin a chhang hlawm bawk.

Rebecca Saimawii chuan Mizo Idol-ah i judge dawn em — tia zawhna a dawn thin chu a ‘wholesale’ ang zawngin a social media account kaltlangin a rawn chhang ta a. Kumin Mizo Idol-ah hian judge thutnaah a inlan loh tur thu a rawn sawi chiang ta a ni.

Mizo hmeichhia zinga Mizo Idol judge hmasa ber chuan — Mizo Idol-ah i judge dawn em? — tiin thupui rawn siamin, “Ni e, Zonet hian Mizo Idol endiktu zinga tel tur hian 2007 khan min sawm ve a, tlinglo inti tak chungin (ka ti fiamlo) ka tel ve a. 2009 phei kha chuan nau pai, nau neihin a chhunzawm! Chutiang a hnawk nuaih chu ni mah ila, in lam atanga endikna turin khawl leh mi min pe zel a, “Eng emaw ka niha min hriatreng thin le”, tih rum rumna turin min cheibawl a ni.

“2011/2013 a lo ni chho a, min la thut thir ta zel!

“Tun, Season 6 atan hian a buatsaihtute’n, ‘Ekhai, i tel ve leh a ngai e, kan hmangaih che a, i hun paltlang thim tak pawh Pathian zarah i kal pel chu a ni ber tawh a, keini chuan englai mahin kan thinhrik ve lo che a, tunah Idol dawhsanah i thut a hun leh ta e,’ min rawn ti a. Min hriatpui angin, fitness lamah hun leh tha ka seng ta rih si a, eizawnna atan ka han hmang chho ve leh nen min beltu te kalsan ngawt thei ka ni ta bik silo a.

“Hnuk ulh teuhin ka hnial a lo ngai ta a,” tiin a share a ni.

Kumin Mizo Idol-ah hian district capital tinah audition round hi neih a ni a. Zanin atangin audition round hnuhnung ber chu Aizawl-ah neih a ni a. Hetah hian Feli Thangluah bakah, Mizo Idol judge hlun — Robin-a leh Rinzauva te’n judge hna an thawk a ni.

Share post:
avatar
  Subscribe  
Notify of