Pro Fight-ah Mizo leh state dang boxer 210 chuang

Auto Draft 29

Zothan Autoworks LPS Pro Fight title chuh turin champion lai pathum nen Mizo boxer 190 chuang ziah luh an ni a, state dang boxer tha 20 chuang an tel bawk ang.

Vawiinah Hawla Indoor Stadium, Republic Vengthlangah tel tumte an inbuk a, medical test nei nghal bawkin champion lai kut atanga kawnghren chhuhsak tumin 193 an inziak lut.

Pro Fight vawi riatnaah hian tel tuma form theh lut 380 an chuang a, a tirah nikum October 10-a khelh tura tih a nih laiin Mizoram Legislative Assembly inthlanpui avangin a hun dawn a ni.

Higher Secondary, College leh University exam nen khelh hun a insut buai avangin tel tuma form theh lut tawh eng emaw zat an inlan thei dawn lova, a hun sawn a nih avangin a hmaa tel tumten harsatna an nei bawk.

Lightfly leh bantam-ah boxer 62 ve ve telin weight zang ber lightfly-ah tawn hriat nei tha 13 leh tawn hriat nei lo 49 an awm a, bantam-ah tawn hriat nei 11 an nih laiin tawn hriat nei lo 11 an ni ve thung.

Light-ah tawn hriat nei lo boxer 40 leh tawn hriat nei tha pasarih an vaiin 47 ziah luh an ni a. Middle-ah 19 an tel a, tawn hriat nei tha panga leh tawn hriat nei lo 14 an ni.

Ligthheavy-ah pathum chiah ziah luh an ni ve thung a, Jack Lalsangliana, Vanlalchhuanga leh MK Munga te bakah state dang atanga tel turten champion lai HC Johnkenty Vanhlimpuia title chhuhsak an tum dawn a ni.

Kawnghren lak kir leh tumin champion tawh mi pathum – Abel Lalawmawia, ZD Lalchhuanawma leh HC Lalramfela an inbuk. Lightheavy-a vawi li champion tawh Serchhip boxer Abela’n middleweight-ah a vawi khat nan a khel ang.

2010 lightfly champion, Lunglei Chanmari fighter ZD-a’n light-ah a khel ve thung dawn a, 2015 bantam champion Chawngtlai chhuanvawr Ramfela’n a khelhna pangngaia a vawi hnih nan champion a tum ve thung dawn a ni.

India hmar chhak state dang atangin boxer 20 chuang an tel thei dawn niin Mizoram Boxing Association Secretary Gereral Dr Lalrozama chuan a sawi.

Manipur leh Assam-in weight hrang pangaah boxer pakhat theuh an neih tur thu an sawi a, Meghalaya leh Tripura atangin boxer pathum ve ve an tel dawn bakah state dang atang pawhin boxer an tirh chhuah tur thu an sawi tawh a ni.

Mizo boxer bakah state dang atanga tel turte nen 210 chuangin champion lai kut atangin title chhuhsak an tum dawn a ni.

February 4-ah LPS Office, Zarkawtah fixture tar chhuah a ni dawn a, February 5, kar leh thawhlehni zanah R Dengthuama Indoor Stadium, Mualpuiah tan a ni ang.

Auto Draft 29

Share post:
avatar
  Subscribe  
Notify of