President’s Cup-ah kai thar Bawngkawn South an champion

President's Cup-ah kai thar Bawngkawn South an champion

LUNGLEN SPORTS
President’s Cup-ah first division kai thar Bawngkawn South an champion a, nimin khan Durtlang field-ah wicket thumin final-a an tumpui Chanmarians an hneh.

Thawk hmasa Chanmarians-in over 15.3-ah wicket hloh zovin run 77 an siam a, Reuben Lalhruaizela’n 22 siamin mi mala thawk chhuak tam ber a ni.

Chanmari team-in run siam an harsat hle a, Lalhriatrenga’n 18 leh Zoremliana’n 16 hlapin mi dangah awmze nei tham an hlawh chhuak zo lo a ni.

Bawngkawn South tan TC Laledenthara’n over thum a vawm atangin wicket thum a la a, run 12 pein man of the match a ni. Joseph Sailo chuan wicket hnih lain run sarih a pe a, Lalhlimpuia’n wicket hnih tho vawm tlain run 12 a pe ve thung a ni.

Bawngkawn South-in over 16-ah chak tura an mamawh run an siam thei a, wicket sarih hlohvin 78 an tlin.

P Lianchama’n 23 hlapin Vanlalhmuaka’n 12 leh R Lalhlimpuia run 10 an siam a, mi mala langsar fal bik awm lo mah se team pumpui thawhhona tha tak an neih an chhawr hle a ni.

First division-a awm tawh thin Bawngkawn South-in tun season atangin Mizoram top flight cricket-ah bul an tan tha hle a, tournament an khelh hmasak berah an champion nghal thei.

Hetih lai hian first division team-ten an player tha an chhawr thei lo hlawm a, Mizoram team-in hun pawimawh dang an hman mek avangin club tinin President’s Cup-ah an team tha ber an hmang thei lo deuh vek a ni.

He tournament-ah hian final lut zo lo player pahnih Indra Kumar Chhetri (Gorkha) chu Best Bowler a ni a, Raihan Jaleem Mazumder (Kulikawn) chu Best Batsmen-a thlan a ni bawk.

Share post:
avatar
  Subscribe  
Notify of