Point 11-in Serie A-ah Juve an sang fal

Point 11-in Serie A-ah Juve an sang fal

Cristiano Ronaldo chuan hun tawp dawnah penalty a pet lut a, chawlhniah Uventus-in 2-1 in mualneitu Lazio an hneh a, point 11-in Serie A-ah an sang fal tawh.

Vawi sarih champion zawn mek Uventus-in si an phur hmasa a, darkar khat an inkhelh hma lawkin Liverpool atanga an lak luh Emre Chan chuan an lamah a tilut palh a, mualneitu Lazio-in hma an hruai.

Mahse, hun tawp lamah Massimiliano Allegri-a team-in an nawr a, minute 74-ah substitute Joao Cancelo chuan hnai tak atangin a pet lut a, mikhual si phurh a sut.

A hnuah Lazio talbuaiin penalty an chawi a, minute 88-ah Ronaldo chuan a chhuih lut a, tlawm thei dinhmun atangin Uve-in point thum an thawk chhuak.

Nikum nipui lai khan Uve-in Real Madrid atangin pound maktaduai 99.2-in Ronaldo an lei a, kum 33 mi Portuguese hian Italian champion tan season khat a hman mekah goal 17 thun tawh a ni.

Inrinni khan pahnihna Napoli-in AC Milan hmachhawnin goal awm lovin an inhnehtawk a, Uve-in hma an hruaina tipungin khelh 21-ah point 59 an hmu tawh a, Napoli-in 48 kawlin pathumna Inter Milan aiin point riatin an sang ve thung a ni.

Vawi riat a zawna Italian title la thei turin Uve dinhmun a tha leh tawh hle a, tual chhung trophy lian pahnih hui kawp turin rin an kai bawk a, tun nilaini hian Italian Cup semifinal an khel dawn a, Atalanta nen an intum ang.

Share post:
avatar
  Subscribe  
Notify of