Paris Masters semifinal-ah Djokovic v Federer

Paris Masters semifinal-ah Djokovic v Federer

LUNGLEN SPORTS
Paris Masters semifinal-ah Novak Djokovic leh Roger Federer an intum dawn a, Karen Khachanov leh Dominic Thiem chuan final luh an inchuh bawk ang.

Zirtawpniah quarterfinal khelh zawh a ni a, second seed Djokovic chuan set hmasa ber a hloh hnuin Croat fifth seed Marin Cilic a hneh a, darkar hnih leh minute 12 chhungin 4-6 6-2 6-3 in a chak a ni.

Kar thara world number one ni tur Djokovic hian Paris Masters title vawi li a la tawh a, a vawi nga nan champion turin semifinal-ah hmabak hautak a sut tlang a ngai a, world number three Federer nen an intum ang.

Kum 37 mi Federer-an harsatna lian tawk lovin Japanese 10th seed Kei Nishikori a vaw tla ve thung a, darkar khat leh minute 21 chhungin 6-4 6-4 in a chak a ni.

Federer hian chawlhni kal ta khan a vawi kua nan Swiss Indoors title a la a, ATP tournament-a vawi 99 a champion-na niin Paris khawpuiah a vawi 100 nan trophy vuak chhuah tumin a bei mek a ni.

Inkhel dangah Russian world number 18 Khachanov chuan fourth seed Alexander Zverev a hneh awlsam hle a, 6-1 6-2 in a chak.

Khachanov hian semifinal-ah Austrian sixth seed Thiem a su ve thung dawn a, French Open-a final lut Thiem hian champion lai Jack Sock a hneh hram a, darkar hnih leh minute 16 an inkhelh hnuah 4-6 6-4 6-4 in a chak a ni.

Share post:
avatar
  Subscribe  
Notify of