ODI vawi khatnaah Australia-in India an hneh

ODI vawi khatnaah Australia-in India an hneh

LUNGLEN SPORTS
Test series a lak hnuah India-in a chet that a chhunzawm lo va, vawiinah Sydney-ah mualneitu Australia nen one-day international series khel tanin run 34-in a tlawm.

Thawk hmasa Australia-in 288 siamin wicket nga an hloh va, Peter Handscomb chuan run 73 siamin ball 61 a hmachhawn a, mualneitu team dinhmun a chawi kang.

Handscomb bakah hian Usman Khawaja (run 59) leh Shaun Marsh (run 54) chuan half century an hlap bawk a, a tawp thlenga ding tluan Marcus Stoinis chuan 47 a thawk chhuak bawk a ni.

India tan chak turin run 289 siam a ngai a, Rohit Sharma chuan a vawi 22 nan ODI century hlap mah se chak tur khawpin mikhual a tanpui zo lo va, over 50-ah 254 siamin wicket kua an hloh a ni.

Run khat mah siam lovin Shikhar Dhawan leh leh Ambati Rayudu an chhuak nghal a, captain Virat Kohli chuan run 8 chiah a hlap bawk. A tira lut Rohit chuan ball 129 atangin 133 a siam ve thung a, MS Dhoni chuan 51 hlap bawk mah se India-in a tum ram thleng turin a dinhmun a siam thei lo va, Australian bowler Jhye Richardson chuan wicket li lain run 26 a pe a ni.

A hmain Test vawi li an khelhah India-in 2-1 in series a la a, Australian leilunga Test series a lak hmasak ber niin hlawhtlinna chhinchhiahtlak tak ni mah se ODI vawi thum an khelh zui turah 1-0 in Australia-in hma an hruai mek a ni.

Kar leh thawhlehniah Adelaide-ah a vawi hnih nan ODI an khel dawn a, Australia an chak a nih chuan series a la nghal ang a, India tan series-a chak turin hnehna chan ngei ngei a ve thung a ni.

Share post:
avatar
  Subscribe  
Notify of