NLUP dawngtute thar chhuah leh siam chhuah zawrhna hmun tur hawng

NLUP dawngtute thar chhuah leh siam chhuah zawrhna hmun tur hawng

LUNGLEN BUREAU
Aizawl, October 2, 2018
Lunglei East bialtu MLA, Mizoram Youth Commission (MYC) Chairman ni bawk, Joseph Lalhimpuia chuan nimin khan Mizorama a hmasa ber tur, NLUP dawngtuten an thar chhuah leh siam chhuahte an zawrhna hmunpui tur, Rs. Nuai 9.26 senga buatsaih tur, NLUP Sales Emporium chu District Industries Centre, Lungleiah a hawng.

NLUP Sales Emporium hawnna inkhawmah hian Joseph Lalhimpuia chuan NLUP Sales Emporium hmasa ber chu Lunglei district mipuiten tangkai taka an hman ngei a beisei thu sawiin hmasawnna mellung pawimawh tak a nih thu a sawi a. Mizo thalaiten hma an sawn theih nan sorkarin chak takin hma a la mek tih sawiin, “MYC kaltlangin NEET, IIT JEE, UPSC, SSC Coaching ngawrh taka kalpui a nih bakah thalaiten mahni kutkawih ngeia eizawnna an neih theihna turin Entrepreneurship leh Skill Development te kalpui a ni,” a ti.

MYC Chairman chuan zirna kawnga hmasawnna ruhrel pawh tihchangtlung zel a nih thu sawiin MYC Office Southern Mizoram Zone pawh hawn mai tura peih fel a nih bakah thalaite tan district tinah ‘Youth Centre’ buatsaih a nih tur thu a sawi bawk.

Joseph Lalhimpuia chuan kum reilote chhungin Commerce & Industries Department hmalakna hlawhtling eng emaw zat hmuh theih leh tarlan theiha a awm chu lawmawm a tih thu sawiin NABARD kaltlang Rs. Vbc 10 chuanga buatsaih tur, Agri Marketing & Infrastructure te, Skill Development Centre hawn thar te, Zobawk khuaa puantahtuten a thlawna puan an tahna hmunpui tur, Handloom Common Facilitation Centre (CFC) sak mek te, Handloom Block Cluster leh NEDP kaltlanga lei, puanthui khawl tharte a tarlang bawk.

Er. Samuel Lalrawngbawla chuan technical report pein NLUP Sales Emporium hi District Industries Centre (DIC) building Ground Floor-ah Rs. Nuai 9.26 senga buatsaih niin office, reception area, thil zawrhna tur room 6, toilet 2 leh garage a awm.

Nimina hawnna inkhawm neihna rual hian MYC Chiarman hian NEDP kaltlanga Rs. Vbc 2.70 senga sak tur, Lunglei Super-Market Annexe lungphum a phum nghal bawk a. Hei hi Lunglei khawpui chhunga bazaar lian ber, Sobji Bazar zauhna project niin NEDP kaltlanga buatsaih tur niin Basement atanga 3rd floor thleng sak tur a ni a. Floor tin zau zawng hi 3388 square feet tura ruahman niin Basement hi parking-ah hman a ni dawn a, ground floor-ah market area leh office a awm dawn a, 1st floor chu market area tur niin 2nd floor-ah market area leh parking a awm dawn a, 3rd floor hi market area a ni bawk ang.

Share post:
avatar
  Subscribe  
Notify of