Nishikori, Bautista Agut leh Swiss-in trophy an la

Japanese star Kei Nishikori chuan Brisbane International title a la a, kum thum deuhthaw trophy a lak loh hnua a hlawhtlin lehna hmasa ber a ni.

World number nine Nishikori hian chawlhniah final khelin 6-4 3-6 6-2 in Russian Daniil Medvedev a hneh a, February 2016 hnua ATP Tour title a vuak chhuah hmasak ber niin a hlim hle tih a sawi.

Kum 29 mi Nishikori hian a banrekah hliam a neih avangin 2017 leh 2018-ah season hmang tluan lovin awl lai a nei ve ve a, kum hnih chhung hian trophy lak a nei lo a ni.

Qatar Open-ah Roberto Bautista Agut a champion ve thung a, inrinni khan final-ah 6-4 3-6 6-3 in Tomas Berdych a hneh.

World number 24 Bautista Agut hian semifinal-ah Novak Djokovic a hneh a, final-a a tumpui Berdych nen an insut hnuhnun vawi thumah tlawm vek mah se darkar khat leh minute 55 an inbeih hnuah a chak a ni.

Hopman Cup-ah a vawi li nan Switzerland an champion bawk a, Roger Federer leh Belinda Bencic chuan mixed doubles-ah Germany aiawha khel Angelic Kerber leh Alexander Zverev an hneh a ni.

Ram hrang hrang mipa leh hmeichhia tang kawpa tennis-a an inelna Hopman Cup-ah Switzerland an champion vawi lina a ni.

Mipa singles-ah Federer-an 6-4 6-2 in Zverev a hneh a, hmeichhe singles-ah Kerber chuan 6-4 8-6 in Swiss player Bencic hneh ve leh mah se mixed doubles-ah 4-0, 1-4, 4-3 in Swiss team an chak a, 2-1 in Germany an hneh a, kum zawnin an champion a ni.

Share post:
avatar
  Subscribe  
Notify of