‘Ni Thar Duhawm’ i nghak chhuak dawn ta! — Ka damlai lungphun a ni : DJ Lalvenhimi’

'Ni Thar Duhawm' i nghak chhuak dawn ta! — Ka damlai lungphun a ni : DJ Lalvenhimi'

Rimawi khawvel huanga a zuan luh tan tir atanga a lo suangtuah tawh thin chu a takin a thlen tir dawn ta niin a lang. Hun eng emaw chen an buaipui hnuah a duhthusam rama cheng turin ni tam pawh a mamawh tawh lo.

DJ Lalvenhimi chuan lam, zai leh hmuhnawm tam tak awmna, thalaite lawm hlawh tur chi — Mizo musical feature film “Ni Thar Duhawm” — tih chu release mai theih turin a peihfel tawh a. Tunah hian a release lohna chiahin a dal ta. Tunkar thar tawpah hian ropui takin a release a tum tawh a ni.

Kum 2013 atangin zaiin hun a hmang chho tak tak tan a, hemi hnu leh tun inkarah hian music video 4/5 vel chu official takin a tichhuak tawh. Mahse, album lam reng reng hi a ngaihsak ve lo emaw tih tur khawpin a sawi ri ngai lo. Chutiang boruak karah feature film ang zawngin ke a rawn pen chhuak hlauh a. Music video album pangngai tak chu duhtawk loin, a aia tha leh midangin an la tihngai loh lam a rawn hrut a. He a project hian Zo rimawi khawvelah, tu emaw tawngkam takin, ‘bung thar min kaipui ngei dawn’ tih a chiang.

'Ni Thar Duhawm' i nghak chhuak dawn ta! — Ka damlai lungphun a ni : DJ Lalvenhimi' 1

DJ-i project thar hi — Ni Thar Duhawm — tia vuah a ni. Hei hi Mizo feature film ang chia kalpui niin, kan hriat theih dan tur chuan ‘Rock of Ages’ tih te, ‘Hannah Montana’ tih ang chi movie ang deuha kalpui a ni a. He film rual hian a audio album tihchhuah nghal a ni bawk ang.

Music drama ang hi hun rei tak atanga a lo ‘dream’ tawh thu sawiin, DJ Lalvenhimi chuan, “Ti ve khanglang ila, hetia mipui hmaa zaia ka chhuah tan tir atang tawhin musical drama ang hi ka lo suangtuah tawh thin a. Mahse, Mizoram angah chuan hetiang musical drama hi a hautak dan tur hre reng chungin ka hel ka hel thin a, tihhlawhtlin erawh ka duh bawk si. Chutia ka ngaihtuahnaa awm leh ka duhthusam chu tun kum hnih thum vel kalta atang khan bul tan rawih turin ruahmanna kan siam a,” a ti a. DJ-i chuan, “Bul tan mai loh chuan rei tak ka rial leh dawn tih pawh ka inhria a, tihhlawhtlin ngei ka duh kha duhthusamah chauh a thamral ang tih a hlauhawm bawk si,” a ti.

‘Liam Mai Rawh’ hitmaker chuan, “Ka dream zawng zawngte ka tihhlawhtlin hi ka ring ngai lo a. Musical drama film anga danglam deuha tih ve kha kan duh bawk si,” tia sawiin, “Tunah hian ka lo dream ve tawh thin chu, a hlawhtlinna tur pawh kan hmu tan dawnin kan hria a, ka tan chuan a hlu lutuk. Ka sawi thiam chiah lo, ka damlai lungphun ka phun ve na a ni ka ti mai. Eng nge kan an dawn ni?” tiin DJ-i chuan a sawi.

‘Ni Thar Duhawm’ musical drama ah hian DJ-i chuan hla pariat (8) vel a dah dawn a. He’ng a hla dah thenkhatte chu a film-ah hian a perform a, thenkhat erawh background music anga a hman te a ni thung dawn a. Mizo rapper thi ta, DJ-i mentor Michael M Sailo hriatrengna pualin hla a dah tel dawn bawk. Chu chu ‘Liam Mai Rawh’ tih kha a ni.
‘High School Musical’ ang chi a a buatsaih, ‘Ni Thar Duhawm’ musical drama hi darkar khat chiah chiaha rei a ni dawn a. He drama ah hian a changtupa ve deuh chu a awm dawn. Chutih laiin, love story a ni dawn hauh lo a. Chhungkaw kima en ho atan pawha awhawm tak a ni tel nghal.

Kumin June ni 16 atangin ‘Ni Thar Duhawm’ musical drama film hi shooting neih a nih hnuah, thla hmasa tawp mai khan an buaipui zo a. A film hi Dinagrafix kutchhuak a ni ang.

Audio album-ah hian track thenkhat chu live music deuh ngat hman a ni. Track zingah hian pahnih hi Thangbawiha enkawl, EME Records buaipui a ni a. A dang zawng hi chu Kings and Prophets Recording Studio lam chan a ni thung.

‘Ni Thar Duhawm’ musical drama leh audio album hi a rualin, tunkar thar tawp, October ni 12 khian Vana pa Hall-ah release tur a ni. Tlangzarh inkhawm hi zan dar 8 atangin neih tan a ni ang.

Share post:
avatar
  Subscribe  
Notify of