Naktuk dar 7 atangin Pro Fight-a tel turte an inbuk dawn

Naktuk dar 7 atangin Pro Fight-a tel turte an inbuk dawn

Zothan Autoworks LPS Pro Fight-a tel tumte naktuk zing dar 7 atangin Hawla Indoor Stadium, Republic Vengthlangah an inbuk dawn a, champion lai leh state dang atanga tel turte an tel ve rih lovang.

Weight hrang pangaah tel tumin mi 380 chuangin entry form an theh lut a, zing dar 7 atanga chhun dar 1 thlengin an inbuk dawn a, medical test an nei nghal ang.

Pro Fight hnuhnung ber 2017-ah champion lai nen 393 ziah luh an ni a, tun tumah hian boxer 300 vel bawr an tel theih Organising Committee chuan a beisei a ni.

February 5 zanah R Dengthuama Indoor Stadium, Mualpuiah tan tur a ni a, a tirah tawn hriat nei lo boxer-te an inhnek hmasa ang a, an inthlitfim hnuah tawn hriat nei tawhte nen an inkhel zui leh dawn a ni.

Tun tumah hian a vawi khat nan India hmar chhaka state pasarihte tel tur ruahman a ni a, anni hi tawn hriat nei huang atanga khel tan tur an nih avangin naktukah an inbuk ve dawn lo va, weight hrang pangaa champion laite pawh ‘Title Fight’ dawnah an inbuk chauh dawn a ni.

Meghalaya atangin weight pathum – lightfly, bantam leh light-ah boxer pakhat theuh an tel dawn tih a chiang tawh a, tun thla a ral rualin state dang atanga tel turte pawh hriat chian theih an ni ang.

State dang atanga tel turte hi National Championship-a tel tawh emaw state level championship-a medal la tawhte an ni ngei tur a ni a, Mizo boxer-te tan fiahna pawimawh tak a ni ang.

Pro Fight vawi riatna atan inbuatsaihna ngawrh takin kalpui a ni a, naktuk hian boxer an inbuk zawh vek hnuah referee leh judge bakah medical duty turten clinic an nei dawn a, hemi zawh hian Organising Committee a thukhawm leh dawn a ni.

Share post:
avatar
  Subscribe  
Notify of