NACO atanga Mizoram HIV zirchiang turten Mizoram an fang tan; HIV kai 16413-ah Aizawl district tam ber

NACO atanga Mizoram HIV zirchiang turten Mizoram an fang tan; HIV kai 16413-ah Aizawl district tam ber

LUNGLEN BUREAU
Aizawl, September 18, 2018
Mizorama HIV pun chak dan a hmuna zirchiang turin National AIDS Control Organisation (NACO) hotute lo zinte chuan nimina Mizorama he lama thawktuten nen an kawm hnuah team 4-ah insiamin vawiin atang khan Mizorama district pathum fang kuala HIV chungchanga Mizoram dinhmun zir chiang turin an feh chhuak tan a. Mizoramah hian August, 2018 thleng khan HIV hrik kai 16413 awmin a kai zinga tam ber hi Aizawl district-a mite an ni.

NACO atanga lo kalte hi nimin khan MSACS leh a thawhpui thenkhatte nen Regency Hotel, Aizawlah an inkawm a. Hetah hian October, 1990 atanga August, 2018 chhungin Mizoramah mi 16413-in HIV hrik an kai tawh a, heng zinga a tam ber, 72.4% chu Aizawl district-a mi niin mi 12,118-in an kai tawh tih tar lan a ni.

Tun hnaia India rama puitling (kum 15 leh 49 inkar) HIV hrik kai hluar dan tarlanna thar, India HIV Estimations 2017 Technical Report-ah Mizoram chu 1-na niin thisen endik atanga mi 2.04%-in HIV kaiin Manipur leh Nagaland chu 2-na leh 3-na an ni tih tar lan a ni bawk.

Nimina inkawmhonaah hian MSACS Project Director Dr. Lalmalsawmi Sailo chuan an thawhrah chu a la lanchhuah a beisei thu sawiin tun hnai kum 2 chhunga Mizorama ruihhlo (heroin) lo lut a tam avangin inchiuna inhmantawm atanga kai an pun thu leh HIV kai zinga nupui/pasal leh kawppui nghet nei lo an tam chu hnathawh tiharsatu pakhat a nih thu a sawi a. NACO leh MSACS programme-a tel chiah lo, a ruka inchiu leh invenna tel lova sex hmangte hi Mizorama HIV punna chhan a nih thu a tar lang bawk.

Aizawl, Lunglei leh Kolasib district tlawh tura lo, zin NACO team leader Dr. Bhawani Singh, Seputy Director (TI), NACO chuan Mizorama HIV darh nasa zel veng turin NACO chuan theitawp a chhuah dawn a, tuna hmalak mekna tichak lehzual turin a taka rawn hmuh leh hnathawktute thusawi ngaihthlak an tum ber a ni tih a sawi ve bawk.

NACO leh MSACS-a thawktute hi team 4-ah insiamin vawiin chawhnu khan team khat chuan Lunglei an pan nghal a, naktukah team khat dangin Kolasib panin a dang team 2-in Aizawl district hmun hrang hrang an tlawhkual dawn a. Lo zinte hian chawlhkar khat chhung hun an hmang dawn a ni.

Share post:
avatar
  Subscribe  
Notify of