Mourinho-an coach nih zui zel a duh

Mourinho-an coach nih zui zel a duh

Manchester United-in manager atanga an ban hnua media kal tlanga a thusawi hmasak berah Jose Mourinho chuan coach atanga chawlh mai a la tum lo va, a la naupang hle tih a sawi.

UAE-a Asian Cup khelh mekah Mourinho hi television-a inkhel pe chhuaktu Qatar-a inbun beIN Sports chuan pundit atan an hmang a, hetah hian a hma lam hun tur chungchang a sawi.

Portuguese chuan coach nih zel a duh a, football level sanga coach ni turin theihna a la nei reng tih a sawi. Kar hnih hnuah kum 56 tling dawn mah se a la naupang a, football-ah rei tak hun a la nei tih a sawi bawk.

December khan United chuan manager atangin an ban a, hemi hnu hian kum 55 mi hi media hmaah a inlan zui lo a ni.

December 18 khan United-in an ban a, hemi hma hian Premier League hmahruaitu Liverpool-in 3-1 in an hneh. United an talbuai nasa a, table-a sang ber aiin tlahniam thei team an hnaih zawk a ni.

Mourinho thlaktu Red Devils striker hlui Ole Gunnar Solskjaer-a hnuaiah United-in hma an sawn ve thung a, inelna hrang hrangah vawi ruk khel tawhin an chak vek a, Premier League-ah parukna niin Champions League khel thei hniam ber palina aiin point rukin an hniam a ni.

Mourinho chuan United a enkawl chhungin hlawhtlinna chhuanawm tak a nei tih a sawi ve thung a, season liam taah Manchester City tluk lovin pahnihna a nihpui a, thil chhuanawm tak a ni, a ti.

Share post:
avatar
  Subscribe  
Notify of