Monaco-in Chelsea atangin Fabregas an la lut

Monaco-in Chelsea atangin Fabregas an la lut

LUNGLEN SPORTS
Spanish midfielder Cesc Fabregas chuan Chelsea chhuahsanin Monaco a zawm fel a, Arsenal-a a khelhpui thin Thierry Henry nen an thawk dun leh dawn.

Kum 31 mi Fabregas hian kum thum leh a chanve daih contract a ziak a, Monaco-in lak luh nan sum seng lo mah se a khelh tam dan a zirin Chelsea hnenah bonus an pek zui a ngai dawn niin an tar lang.

Inrinni khan FA Cup third round-ah Chelsea leh Nottingham Forest an inkhel a, hetah hian Fabregas hi Chelsea captain niin hun a tawp rualin lungchhe takin khelmual a chhuahsan a ni.

2003 khan Arsenal atangin professional a luhchilh a, 2011 thleng awmin Barcelona-ah a insawn a, 2014 khan Chelsea-in an la lut ve leh a ni.

English football a khelh chhungin Premier League title pahnih, FA Cup trophy pahnih leh League Cup title pakhat lain vawi 501 a khel a, Barcelona-ah trophy paruk a la bawk.

French league-a talbuai nasa tak Monaco-ah bul a tan tha leh dawn a, Arsenal-a a khelhpui thin Henry chuan nikum October atangin Monaco a enkawl a, French league kal mekah a mawng ber dawttu an ni a, khelh 18-ah point 13 an hmu a ni.

Hetih lai hian Arsenal midfielder Aaron Ramsey chuan tun season a tawp rualin contract a neih sa a hmang zo dawn a, tun January bazar hi Gunners-in an hralh chhuah theih hun hnuhnung ber a nih tawh avangin club hrang hrangin lak theih an inbeisei.

Italian champion Juventus chu kum 28 mi Ramsey la lut thei tura beiseiawm ber an ni mek a, mahse, Ramsey hian Arsenal-a contract a neih a hmang zo dawn nge tun January chhungin a chhuahsan dawn tih a la chiang lo niin an tar lang.

Nikum September khan Arsenal-in kum li dang contract ziah belh turin Ramsey an dawr a, hlawh chungchang bakah sum leh paiah an inrem theih loh avangin a puitling ta lo a ni.

Share post:
avatar
  Subscribe  
Notify of