MNF-in LDCC President thu sawi mak an ti, an MLA-in district tipuitling tura hma a lakna mipuiin an hre lo zawk an ti

MNF-in LDCC President thu sawi mak an ti, an MLA-in district tipuitling tura hma a lakna mipuiin an hre lo zawk an ti

LUNGLEN BUREAU
Aizawl, October 5, 2018
South Tuipui Block I MNF chuan tun hnaia Lunglei District Congress Committee (LDCC) President C.Lalhmingliana’n “District capital ngiatna Congress MLA-te bialah Pu John Siamkunga, Hnahthial bialtu MLA chiah hi a bial leh Mizoram tana district pek tum a ni,” tia a sawi chu mak an tih thu leh an bial mipuiten an MLA-in district tihpuitlin tuma hma a lakna sawi tur an hre meuh lo zawk tih an sawi.

Vawiina South Tuipui Block I MNF Media Cell-in thuchhuah an siamah Thawhtannia Bhavan-ah Devotion cum Political Session an neiha LDCC President thusawi mak an tih thu hi sawiin, “He bial hmuhsitna tawngkamah a ngaih theih hialin kan hria,” an ti a. “Kan bialtu MLA hian Hnahthial district tipuitling tura hma a lakna hi a bial mipuite hian sawi tur kan hre meuh lo zawk a nih hi!!” an ti a ni.

An thuchhuahah chuan bialtu MLA a nih tirhin John Siamkunga hian district tihpuitlin chu a hna hmasa a nih tur thu sawi mah se district puitling an nih theihna turin eng chen nge a thlenpui tawh tih an zawt tih an tar lang a. An MLA chuan Hnahthial District Function Demand Committee (HDFDC) hruaitute hnenah pawh, “Saitual leh Khawzawl hi lo thawhpui suh u,” a tih zawk thu leh district sawipui tura Chief Minister hmuh theihna tur pawh tihhlawhthlinsak thei lotu a nih thu an tar lang bawk.

South Tuipui Block I MNF chuan, “Bialte tana district puitling duh tak taktu, Pu R.Lalzirliana leh Pu Lalrinliana Sailo ten an lal thutthleng an kalsan ngam lai hian Pu John Siamkunga chu a inkuangkuah mai mai,” an ti bawk.

South Tuipui Block I MNF chuan Chief Minister Lal Thanhawla chuan 2008 inthlan dawnah district fuke kim a tiam tih sawiin, “Hmanni lawka Hnahthial Kohhran Joint Committee (HKJC) hruaituten a thlenna PWD IB Hnahthialah hmuin district tihpuitlinna tumna a awm rih loh thuin a chhang leh si,” an ti a. Hnahthial district chungchangah chuan Congress party chuan ngawih mai chu an intihtheih tawk nia a lan thu sawiin, “A ngaihna hria leh sorkar mai tur, MNF hian a tihpuitlin lai hi lo thlir mai rawh u,” an ti bawk.

Share post:
avatar
  Subscribe  
Notify of