MNF hi sorkar leh tlak an ni tawh lo: Zodintluanga, Treasurer, CLP

MNF hi sorkar leh tlak an ni tawh lo: Zodintluanga, Treasurer, CLP

LUNGLEN BUREAU

Lawngtlai Sept. 8, 2018

Inrinni khan Lawngtlaiah Congress Legislature Party Treasurer leh cabinet minister ni bawk Zodintluanga chuan Lai Autonomous District Council (LADC)-a sorkarna chelh mektu Congress Member of District Council (MDC)-te leh Lai District Congress Committee (LDCC) hruaitute a kawm. Intawhkhawmnaah hian thu sawiin, “MNF hian an sawtkar laiin hnam ro tling tur an tichhe vek a, mipuiin an la theihnghilh lo. Congress sorkar kal mek hian an tihchhiatte kan siamtha leh vek a, hmathar kan chhawp teuh a, chuvangin kum 2018 inthlan lo awm turah hian hnam ro tichhetute hi sorkar tlak an ni lo a ni tih hi Zoram mipuiten hria se ka duh,” Zodintluanga chuan a ti.

CLP Treasurer chuan LADC Chief Executive Member T. Zakunga kaihhruaia meeting neihah hian MNF chu Shillong NEIGHRIMS Hospital ropui nena Congress hmasa sorkar laia sorkar laipui atanga Falkawna Referral Hospital siamna tur pawisa sanction rual reng MNF leh MPC tangkawpten sorkarna an lak tak avanga an tihchhiat tak vekte kha mipuiin an theihnghilh tawh lo ang a ti. “Hnam ro tling tihchhiat veka kum 10 chhunga Referral Hospital tura ar vulh a, 5th IR Batallion te dah ta mai mai tute hi mipuiin an hnawl tawh. Tuirial HEP Megawatt 60 pechhuak tur pawh compensation an duh luat vangin tihtawp vek a nih kha. Heng hnam ro pahnih ka sawi te hi Congress chuan kan din thar leh vek a Falkawnah phei chuan Medical College kan din hial a, Tuirial HEP pawh Prime Minister of India meuhin hawn tlakah ngaiin a rawn hawng a ni,” tiin MNF chuan mahni hlawkna an hmuh chuan tihchhiat an hreh loh thu a sawi.

MNF party chu an Founder President Pu Laldenga boral hnuah Zoram mipuiin majority an la pe ngai lo a ni tih sawiin, “An Founder President awm loh hnu hian kum 1998-ah khan PC nena tangdunin an sorkar tawk a, kum 2003 khan MLA thenkhat an uire avangin an orkar tawk tawk bawk a ni. Congress chuan party malin 2008 khan majority neiin MLA 32 kan nei a, kum 2013 khan majority min pe lehin MLA 34 kan nei a ni,” tiin Pu Zoramthanga kaihhruai MNF hi majority neiin an la sorkar ngai loh thu a sawi.

MNF MLA ni laite kum 2018 inthlana tling zo tur an awm tawh loh thu sawiin, Zodintluanga chuan Aizawl West II bial chu kum 2008 inthlanah party mala dingin MNF pathumna an ni a, PC Candidate Brig T Sailo hneh taka tlingin kum 2013-ah MNF leh MPC chu thawkhovin Congress candidate hnawhsarum taka an dah chu party pahnih thain a hneh tawk tawk chauh a ni tiin Zodintluanga chuan a sawi. “Tunah chuan MNF hi an mal din ve mai dawn bakah ZPM an awm tawh bawk a MLA ni lai hian chance an nei lo reng reng a ni,” a ti bawk a. Tuikum lam en pawhin MNF in MPC an thawhpui chungin vote 14 chauhin inthlan hmasakah hnehna an changa MPC vote tel lo chuan MNF hian ‘chance’ an neih loh chian thu a sawi bawk.

Siaha bial chungchang sawiin, “Siaha lam en ila kum 2013 khan MNF leh an tualchhung party lian MDF an tangkawp a, tunah chuan MDF chu BJP ah an inlet tawha Mara ramah MNF hian vote an hmu tam ngai lova he bialah pawh hian MNF MLA ni lai tan hian tlin leh theihna tur a awm lo,” CLP Treasurer chuan a ti bawk.

Share post:
avatar
  Subscribe  
Notify of