Mizorama khaw fai ber Biate

Mizorama khaw fai ber Biate

LUNGLEN BUREAU
Aizawl, October 2, 2018
NEDP hnuaia hmalakna pakhat, Climate change, cleanliness & sanitation drive hnuaia hmalakna, faina kawnga Mizorama khuate intihsiakna buatsaih result chu tukina Vanapa Hall-a Urban Development & Poverty Alleviation Department (UD&PA)-in a huaihawt, Faina Hapta hawnna inkhawmah result puan a ni a. Mizoram chhunga khaw fai berah nikuma he lawmman lo la tawh, Biate bawk thlan leh a ni a, lawmman atan Rs. 1,00,000/- hlan an ni.

Mizoram khawpui fai ber intihsiakna 2018 hi category pahnihah then a ni a. Category 1-ah district khawpuite inelin khawpui dangte chu category 2 huangah an intihsiak thung a. Mi thiam bik, panel of experts dinin anni hian September thla chhung khan Mizoram khawpui 23-te an fangin an endik a ni.

Biate khua hian Category II-a khawpui dangte inelnaah point 94 hmutu, 1-na dinhmun a hauh leh ta a. An hnuaiah hian point 93 hmutu, Zawlnuam leh point 91 hmutu, Lengpui awmin an dawt a. A pum pui huap (Category I&II)-a khaw fai ber atan Biate hi thlan a ni bawk a, Zawlnuam chuan dawtin Lunglei chu 3-na a ni bawk.

Khawpui fai inelna result hi Faina Hapta hawnna inkhawma khuallian, Planning Minister Lalsawta chuan a puang a. Category I leh II-a lawmman dawngte hnenah hian 1-na hnenah Rs 1,00,000/-, 2-na hnenah Rs 70, 000/- leh 3-na hnenah Rs. 50,000 hlan an ni.

NEDP hmalakna, Climate change, cleanliness & sanitation drive hnuaiah hian Mizoram pum khaikhawmtu, Mizoram Sanitation Task Force din niin district tinah District Sanitation Task Force leh khawpui tinah Town Sanitation Task Force din vek a ni a. Khawpui fai ber inelna hi July 16, 2018 khan UD&PA Minister Zodintluanga pisaah hawn a ni.

Khaw fai inelnaah hian endikna tehfung hrang hrang – bawlhhlawh thliar hran te, waste re-use lam te, pawnlera inthiar awm dan dinhmun te, tualchhung mite hmalak dan leh vantlang inzirtirna (public awareness) leh thil dang hrang hrang hmanga endik an ni.

Share post:
avatar
  Subscribe  
Notify of