Mizoram Taekwondo-in award semin hruaitu an thlang

Mizoram Taekwondo-in award semin hruaitu an thlang

Vawiinah Aizawl Press Club-ah Mizoram Amateur Taekwondo Association (MATA) chuan General Body Meeting an nei a, 2019 atanga 2022 hruaitu tur an thlan bakah MATA award an sem bawk.

MATA chuan dan bu siam that rawtna an pawm a, kum laihawl velah a vawi thum nan Taekwondo Fight League neih ni se an tih bakah National Referee seminar leh World Taekwondo Federation Black Belt exam thleng chhunzawm zel turin thutlukna an siam a ni.

2018 chhungin Mizoram pawna inelna hrang hrangah medal 204 an la a, taekwondo player 231-in Mizoram sorkar atangin incentive cash award Rs 81,15,250 an dawng tih tar lan a ni bawk.

General Body Meeting hi President Dr Ruakhuma Colney chuan a kaihruai a, Senior Vice President Pu Vanlalsawma chuan kumin atan MATA Calendar a pharh a, an pawm.

2018 MATA Award sem chhuakin Best Player of the Year-ah Lalthlamuanpuia, Venghlui (Republic Vengthlang Taekwondo Club) an thlang a, Best Instructor-ah Lalmuanawma, Ramhlun Vengthar (Aizawl Taekwondo Academy), Best Referee-ah Vanlalhmangaihthangi, Armed Veng (Armed Veng Taekwondo Academy), Best District Association-ah Kolasib, Best Club-ah Aizawl Taekwondo Academy, Electric Veng leh Best School-ah Exodus English School, Chaltlang thlan an ni.

2019 atanga 2022 chhunga office bearer turin mi pariat an thlang chhuak a, President atan Dr Rualkhuma thlang nawn lehin Senior Vice President-ah Pu VL Sawma, Vice President-ah Pu K Laldawngliana leh CH Vanhmingthanga, General Secretary-ah Pu Joseph Thansanga, Assistant General Secretary-ah Pu Joseph Lalsiama, Treasurer-ah Pu F Lalhmingliana leh Finance Secretary-ah Pu C Lalfakzuala te an tling bawk a ni.

Share post:
avatar
  Subscribe  
Notify of