Mizoram Journalist Association, Kolasib district ten Lalremsiami chawimawi

Mizoram Journalist Association, Kolasib district ten Lalremsiami chawimawi

LUNGLEN BUREAU
Aizawl Oct 31, 2018
Nimin khan Mizoram Journalist Association, Kolasib District chuan MJA Press Club, Kolasib-ah Lalremsiami, Indian Hockey player chawimawina leh kawmna hun an hmang.

Lalremsiami chawimawina hun hi Andrew VL Auva, Vice President MJA, Kolasib District chuan a kaihruai a, R. Lalhmingthanga, President, MJA, Kolasib District in chawimawina thuziak hlanin thu a sawi. MJA President chuan Lalremsiami tih leh thawhrimna, tumruhna leh taimakna tih hi a inhmeh em em tih a sawi a, Mizo mipuite leh thalai ten kan entawn ber tur anih thu a sawi. Remsiami programme zawng zawng chuan Kolasib leh Mizoram mipuite rilru a luah thu sawiin, “Mizo tawh phawt chuan remsiami hi kan ngaihven em em vek a, hmabak êng tak a neih hi hlawktling taka hmang chhunzawm turin duhsakna kan hlan a ni” tiin a sawi.

He hunah hian Remsiami Nu Lalzarmawii pawhin thusawiin an fanu leh an chhungkuain malsawmna an dawn chu Pathian vang anih thu a sawi a, “kan la tawn ngai loh chawimawina zawng zawng kan dawng a, Kolasib mipui leh Mizoram mipui ten thilpek tam tak min pek avangte, duhsakna zawng zawng min hlan avangin lawmthu kan sawi tak zet zet a ni” tiin a sawi.

Indian Hockey player Lalremsiami pawhin thusawiin, Kolasib leh Mizoram mipui ten ropui taka an lo chawimawi avangin lawmthu a sawi a, Kolasib mipui ten an lo hmuah ni-a mipui tam tak leh pipe band nen, Kolasib tlangval ten an lo zâwn lai thlalakte chu India tana a khelhpui te pawhin an lo hmuh thu leh ropui an tih thu a sawi a, India National Team-a an captain Rani Rampal pawhin a Pa ngei rawn biaiin Mizoram-ah rawn kal ve a chak thu a rawn hrilh niin a sawi bawk.

Lalremsiami hi Ni 4.11.2018 hian India Hockey team zawm turin Bengaluru lam a pan leh dawn a, kum 2020-a Olympic lo awm tur atan an in buatsaih nghal dawn a ni.

Share post:
avatar
  Subscribe  
Notify of