Mizoram hmun hrang hrangah Voluntary Blood Donation Day leh thisen pek rûnpui

Mizoram hmun hrang hrangah Voluntary Blood Donation Day leh thisen pek rûnpui

LUNGLEN BUREAU
Aizawl, October 1, 2018
Vawiin hi National Voluntary Blood Donation Day a ni a, Mizoramah pawh Mizoram State AIDS Control Society (MSACS), Association for Voluntary Blood Donation leh blood bank-te huaihawtin Mizoram hmun hrang hrangah hman a ni a, thisen pek rûnpui buatsaih a ni bawk.

Aizawlah chuan Hrangbana College Golden Hall-ah hman a ni a, National Health Mission (NHM) Director Dr. Lalrozama chu khuallian niin kumina National Voluntary Blood Donation Day thupui, ‘Hlimna hi thisen pek atangin a awm’ (Happiness is donating blood) tih chu thu dik a nih thu sawiin, “Thisen pe tur hian invawn thianghlim a ngai a, ruihhlo leh mipat hmeichhiatna hman sual laka fihlim turin thian tha lo kalsan an ngai thin,” tiin a sawi a. Voluntary blood donation-ah Mizoram chu 100% a nih theih nan tan lak zel a ngaih thu a sawi bawk.

Association for Voluntary Blood Donation President C.Lalnunnema pawhin thu sawiin, “Pawl hrang hrang anga thisen pek rûnpui neih kan ngai pawimawh zel a, chutih rualin, mi mal mahnia thahnemngaia blood bank a thisen pe kan awm that loh chuan mamawh khawp thisen kan nei lo thin a, regular taka mahnia pe (regular blood donor) kan pun zel a ngai a ni,” a ti a. Tun hnaiah hmeichhe thisen pe an pun thu sawiin, “Mizorama voluntary donation 83% zinga 30% dáwn hmeichhia an ni tawh a, India ram pum huapa 5% aiin kan sang hle a ni,” tiin a sawi bawk.

Inkhawm kaihruaitu, MSACS Project Director, Dr. Lalmalsawmi Sailo chuan, “Mi dangte tana kan tih theih hlu ber chu anmahni thisen pek hi a ni kan ti thin a; mahse, tunah chuan thisen thianghlim pek a ngai tia kan sawi a tul tawh. Damlo mamawhte hnena thisen thianghlim pe tlaka invawn thianghlim leh HIV darh zel ven hi thalaite hian kan mawhphurna a ni tih kan hriat chian a pawimawh,” a ti.

Day hawnna inkhawmah hian MSACS leh Blood Bank-a thawk te, AVBD hruaitute leh Hrangbana College zirtirtu leh zirlaite an tel a. AVBD General Secretary Lalrinkima tarlan danin, kum 2017-18 chhung khan Mizoram pumah thisen unit 26,248 pek a ni a, heng zinga unit 21,880 (83.36%) chu pek bik nei lova a thlawna pek a ni. Voluntary donation zinga unit 15,601 (59.44%) chu páwl hmingin, unit 6,279 (23.92%) chu individual voluntary donation a ni thung.

Sorkar kum kal mekah thla nga (April-August, 2018) chhungin thisen unit 11,461 pek a ni tawh a, heng zinga unit 9,532 (83.20%) chu voluntary donation a ni a, blood donation camp tum 183 neih a ni tawh bawk.

National Voluntary Blood Donation Day hawnna inkhawm zawhah Aizawl Civil Hospital Blood Bank leh Hrangbana College NSS bultumin zirlaiten thisen an pe nghal a. Unit 200 pein petu hi mipa 134 leh hmeichhia 66 an ni.

National Voluntary Blood Donation Day hi district khawpui dangah pawh hman a ni a, thisen pek rûnpui an huaihawt nghal bawk a. Hriat theih chinah Lungleia Lunglei College-a pekah mipa 51 leh hmeichhia 36-in unit 87 an pe a. Siaha-a ECM HSS-ah pekah mipa 24 leh hmeichhia 3, a vaiin unit 27 an pe a. Kolasib-ah CZ Higher Secondary School zirlaiten thisen an pe a, mipa 26 leh hmeichhia 28 ten thisen hi pein, mi 54 an ni.

India Society of Blood Transfusion & Immuno Haematology bultumin October 1, 1975 khan All India Voluntary Blood Donation Day hman a ni a, chuta tang chuan October 1 apiangin National Vluntary Blood Donation Day hman a ni a. Kum 1996 atangin NACO hriatpuiin hman tan a ni a, Mizoramah chuan kum 1999-ah hman tan a ni.

Share post:
avatar
  Subscribe  
Notify of