Mizoram district khawpui tin leh khaw hrang hrangah I-Day lawm

Mizoram district khawpui tin leh khaw hrang hrangah I-Day lawm
Finance Minister Lalsawta'n Mamita I-Day lawmna a hmanpui pahin District Hospital-a damlote a tlawh

LUNGLEN BUREAU
Aizawl, August 15, 2018
Mizoram hmun tinah India ramin mahnia ro a inrel hranna ni champha vawi 72-na chu lawm a ni a. District khawpui zawng zawnga Independence Day lawm a nih bakah hian hriat theih chinah Kawrthah, Bairabi, Kawnpui, Hnahthial, Ngopa, Thenzawl, East Lungdar, Kamalanagar leh Tlabung-ah te pawh hlim takin Independence Day hi lawm a ni.

Hetihlai hian Saitual Sub-Division-ah chuan Saitual District Implementing Demand Committee (SDIDC)-in sorkar ruat VIP lo kal lo tur leh a lawmnaa mipuite tel ve lo tura a beisei avangin SDO (Civil) leh a staff-te chauhvin SDO (Civil) Complex-ah an lawm a ni.

Lunglei
Lunglei district-ah pawh ropui takin Independence Day lawm a ni a. A lawmna pui ber chu Lunglei Thuamluaia Mualah Minister John Rotluangliana’n Hnam Puanzar pawtparhin parade contingent 24-te Hnam Puanzar chibai bukna a chhang let a, parade intihsiaknaa tithate leh Independence Day puala Sports Association-te’n intihsiakna hrang hrang an buatsaiha a tithate hnenah lawmman a hlan bawk.

Thuamluaia Muala Independence Day lawmna neih zawh hian Minister hovin mi sawm bikte tan Lunglei Government College Multipurpose Hall-ah DC’s At Home hman zui a ni.

Siaha
Siahaah chuan District Playground-ah Minister H.Rohluna hovin Independence Day vawi 72-na hi lawm a ni a. Minister hian Hnam Puanzar pawtpharhin Parade Contingents 15-in Hnam Puanzar chibai an buk a chhanglet a. Independence Day lawmna pual hian MADC CEM chuan sawm bikte pualin CEM Bangla-ah AT HOME a buatsaih.

Independence Day lawmnaah hian Siaha Election Branch chuan Systematic Voters Education & Electoral Participation (SVEEP) Signature Campaign beihpui an thlak mek chu kalpui chhunzawmin Minister pawhin a hming a ziak ve a ni.

Champhai
Champhaiah chuan Chhangphut Field-ah Independence Day vawi 72-na urhsun takin lawm a ni a. Minister Zodintluanga’n Hnam Puanzar pawtpharhin parade contingent 18-te chibai bukna a chhanglet a. Independence Day 2018 puala buatsaih U-11 Boys & Girls Badminton Tournament lawmman a sem bawk.

Chhangphut Field-a hun hman zawhah leh mi sawm bikte tan Keifangtlang-a Jericho Garden-ah ‘VIP’s At Home’ neih a ni a. Chawhnu lamah Champhai District Football Association buatsaih Independence Day Football Tournament Final khelh a ni.

Kolasib
Kolasibah chuan Sports Stadium-ah Assembly Speaker Hiphei hovin Independence Day lawm a ni a. Speaker hian Hnam Puanzar pawt pharhin parade contingent hrang hrangin Hnam Puanzar chibai an buk chu chhang let a ni.

Serchhip
Serchhipah chuan Khawtetlang Field-ah Minister Vanlalawmpuii Chawngthu hovin ramin zalenna a neih champha vawi 72-na lawm a ni a. Vanlalawmpuii Chawngthu hian Hnam Puanzar pawtpharhin Hnam Puanzar chibai buktu parade contingent-te chibai bukna a chhang let a. Playground-a hun hman hnuah VIP’s at Home chu sawm bikte tan DC Bangla, Khawtetlangah buatsaih zui a ni bawk.

Lawngtlai
Lawngtlai district-ah pawh ropui takin Independenc Day vawi 72-na lawm a ni a. A lawmna pui ber, AOC Veng Playground-ah Minister C.Ngunlianchunga’n Hnam Puanzar pawt pharhin parade contingent 10-ten Hnam Puanzar chibai an buk a chhang let.

Independence Day puala intihsiakna buatsaih, football leh badminton bakah parade-a tithate hnenah Minister bakah DC, LADC CEM leh Chairman ten lawmman an hlan a; LADC Conference Hall-ah CEM-in sawm bikte tan thingpui ruai a buatsaih bawk.

Mamit
Mamit GSA Playground-a Independence Day lawmnaah Minister Lalsawta’n Hnam Puanzar a pawt pharh a, parade contigent 17-ten Hnam Puanzar chibai an buk a chhang lêt a. Sawm bikte pualin DC Complex-ah VIP At Home buatsaih a ni bawk.

Minister hian Independence Day pual hian Mamit District Hospital-a damlote a tlawh bakah Mamita Home hrang hrang – Buannel Childrens Home, Observation Home leh Joshua’s Childrens Home te tlawhin thilpek a pe a, District Jail-a tlawh bawk.

Share post:
avatar
  Subscribe  
Notify of