Maxi cab-ten All Mizoram Permt an tih hi tul rih lovah sorkarin a ngai : Transport Minister

Maxi cab-ten All Mizoram Permt an tih hi tul rih lovah sorkarin a ngai : Transport Minister

LUNGLEN BUREAU
Aizawl, October 3, 2018
Transport Minister John Rotluangliana chuan All Mizoram Maxi Cab Owner Association-in nawrh an huaihawt chu pawi a tih thu sawiin, “An thil phut, All Mizoram Permit an tih hi tun atan chuan Mizoram sorkarin tul rihah a ngai lo,” a ti a, sorkar rate siam pawh ennawn a la nih loh thu a sawi bawk.

Vawiina Rajiv Nagar-a Rs. Nuai 154.48 senga sak Tourist Lodge a hawnnaah Transport Minister chuan he thu hi sawiin, “An thil phut, rate tihsan chungchang hi May 22, 2018-a atanga hman tan chauh a ni a, thla 4/5 chauh kan la hman avangin ennawn leh a ni rih lo,” a ti a. An thil phut pakhat, All Mizoram Permit chungchang pawh tun atan chuan Mizoram sorkarin tul rihah a ngai lo tih sawiin, “A chhan chu Maxi cab-te hi line bik neiin an service theuh va, chumi kara All Mizoram Permit nei bika duh duhna hmun an tlan bik hi thil tha berah a ngai lo a ni,” a ti bawk.

Transport Minister chuan Maxi Cab Owner Association-te chu mipui tana an rawngbawl nana service an ni tih in hre renga an nawrh mek chu titawp turin a ngen nghal bawk a ni.

Tourism Minister ni bawk chuan mumang ram maia an lo ngaih thin, Rajiv Nagar-a Tourist Lodge building hawn an ni ta chu ni chhinchhiah tlak a nih thu sawiin, “Rajiv Nagar leh a chhehvelte tana danglamna thlen tura a intiamna chuan rah a chhuah mek zel,” a ti a. Mizoram sorkarin ramri hnaiha awmte chu a ngaihsakin hmasawnna hna hrang hrang an thawhte chu hmuh hmaih lo turin a chah bawk.

Bialtu MLA ni bawk hian Soil & Water Conservation Department, Mamit district hnuaia NEDP-NLUP Convergence-a Broom trade thlangtu mi 26-te tan Rs 50,000/- theuh an dawnna tur lehkha a sem nghal bawk a. Rajiv Nagar I leh II-a tanpuina dawngtute hi an training-na lehkha an dawn hmang hian an account atangin pawisa an la chhuak thei dawn a ni.

Rajiv Nagar Tourist Lodge thar hawnna inkhawm hi Zonunthari, Under Secretary, Tourism-in a kaihruai a. Lalthakimi Pachuau, Deputy Director-in technical report a pekah Tourist Lodge hi 136.07 sq.m a ni a, Mizo chhiara chhawng 3 niin, ground floor-ah hian Reception, Lounge Area, Kitchen leh Dining Hall a awm a, a chung chhawng hnih chu mikhual thlenna tur a ni a. October 23, 2017 atanga sa tanin October 2, 2018-a zawh a ni.
Minister hian BADP sum senga Rs. Nuai 20 lakh senga sak, Young Chakma Association Hall a hawng nghal bawk a.

Bialtu Minister hi Tourism Department hotute bakah Z.Lalthanzuala, District Soil Officer leh khawtlang hruaituten an tawiawm.

Share post:
avatar
  Subscribe  
Notify of