Man United-in trophy lak kan tum : Solskjaer

Man United-in trophy lak kan tum : Solskjaer

Burnley mikhuala zanina English Premier League khel tur Manchester United manager lailawk Ole Gunnar Solskjaer chuan palina nih phak ringawt an tum ber lo tih a sawi.

Red Devils hian an player hlui Solskjaer an lak luh atangin hma an sawn hle a, inelna hrang hrangah vawi riat khel tawhin an chak vek a ni.

Premier League-ah parukna niin hmahruaitu Liverpool aiin point 16-in an hniam a, FA Cup leh Champions League-ah hmabak an la nei bawk a, Solskjaer chuan season thara Champions League khel phak ringawt an thlir ber lo va, trophy lak an tum tih a sawi.

Norwegian coach chuan eng lai pawhin United-in league champion nih a tum reng thin a, tun season-ah thil a kal tluang tawk lo a nih pawhin hnehna kawnga kir leh turin hma lam a pan mek, a ti.

Champions League leh FA Cup trophy chuhtu zingah an tel mek a, league-a a sang pali zinga tel phak ringawt an buaipui ber lo va, United manager a nih angin an hmabak zelah a tahtawla chak tumin rilru a siam tih a sawi.

United-in FA Cup fifth round-ah champion lai Chelsea an tum dawn a, an hmabak a awlsam dawn lo hle. Hetih lai hian fourth round-ah Arsenal tlawhin 3-1 in an chak zo chiah a, a vawi 13 nan FA Cup champion ni thei turin beiseina an nei thar hle a ni.

Red Devils hian Premier League-ah point thumin palina Chelsea an pha lo va, zaninah Burnley mikhualin zan lai pelh dar 1:30 atangin an khel dawn a, hetih rual hian pahnihna Manchester City-in Newcastle tlawhin dar 1:30 atang thovin an khel dawn a ni.

Share post:
avatar
  Subscribe  
Notify of