Man City-in si kaw faiin Burton an hneh

Gabriel Jesus chuan vawi li khungin nilaini zan English League Cup semifinal first leg-ah Manchester City-in si kaw faiin an mikhual Burton an hneh.

City hian a tir atanga a tawp thlengin hlauhawm takin an nawr tluan zak a, minute ngaah Kevin de Bruyne chuan goal hmasa ber a khung.

Darkar chanve an inkhel tihin Jesus chuan a thun belh a, Etihad Stadium-ah Brazil striker hian mi malin hun chhinchhiahthlak tak a hmang a, minute li hnuah khung belhin second half-ah hattrick siamin a hnuah goal khat a thun belh leh a ni.

City tan Oleksandr Zinchenko, Phil Foden, Kyle Walker leh Riyad Mahrez chuan vawi khat theuh an tilut bawk a, kawng engkimah third division team Burton an bet hneh hle a, City mikhual ve leh dawn mah se beisei tur a tam tawh lo.

September 1986 khan Liverpool-in si 10 faiin Fulham an hneh a, hemi hnu hian tun hi League Cup-a inhnehna sang ber a ni a, kum 31 chuang chhunga City-in inkhel vawi khata goal riat aia tam an khung hmasak ber a ni bawk.

Chawlhni khan FA Cup third round-ah Pep Guardiola-a team hian si sarih faiin Rotherham United an hneh zo chiah a, ni li chhunga vawi hnih an khelhah goal 16 khungin an chhuah miah lo a ni.

Thawhlehni zan khan League Cup semifinal first leg hmasa zawkah Harry Kane-a penalty pet luh hmangin Tottenham-in si khat faiin Chelsea an hneh tawh a, second leg an khelh leh dawn avangin tlang tur zawk a la chiang lo hle.

Chutih laiin champion lai City erawh final khel ngei tura ngaih an ni ve thung a, tun dinhmunah Guardiola team-in hma lam an pan mek a, kar leh thawhtanniah Wolves mikhualin Premier League an khel zui dawn a ni.

Share post:
avatar
  Subscribe  
Notify of