Man City an tlawm, Man Utd an chak zo lo

Man City an tlawm, Man Utd an chak zo lo

Thawhlehni zan English Premier League-ah Manchester City an tlawm a, Burnley hmaah Manchester United chak tluang a tawp a, Arsenal erawh an mikhual Cardiff lakah an chak.

St James Park-ah City an feh chhuak a, rang takin goal khung mah se second half-ah vawi hnih an chhuah a, tun hnaia talbuai Newcastle United-in 2-1 in an hneh.

Second 24 chiah an la inkhel tihin Sergio Aguero chuan City tan a pet lut a, a hnu lawkah Kevin de Bruyne-a freekick pet atangin Aguero hian a thun zui leh. Mahse, Referee Paul Tierney chuan a pawmsak lo va, chawlhlawk thlengin si khat faiin City-in hma an hruai.

Second half-ah City tlar hnung an che buai a, minute 66-ah Salomon Rondon chuan Newcastle si phurh sut nan a tilut a, hun tawp dawn lamah Ferdiniau chuan penalty chawiin Matt Ritchie chuan City goalkeeper Ederson-a dan theih lohvin a chhuih lut a ni.

Newcastle tan hnehna hlu tak a ni a, a hmaa City nen league an khelh hnuhnun vawi 22-ah chak an nei miah lo. Dinhmun himah Rafa Benitez-a team an inhlangkai a, khelh 24-ah point 24 hmuin 14-naah an inhung.

City-in hmahruaitu Liverpool nena an inkar tihzimna hum tha an bawhpelh ve thung a, season liam ta pumpuia point an hloh aiin league kal mekah an paih hnem tawh zawk a, title humhim an tumna kawngah harsatna an tawk thar leh.

Zaninah hmahruaitu Liverpool-in Leicester City an tum dawn a, an chak a nih chuan pahnihna City aiin point sarihin an sang dawn a ni.

Inkhel dangah United-in Burnley an mikhual a, hun tawp hma minute thum chhungin vawi hnih an khung a, tlawm pumpelhin 2-2 in an inhnehtawk.

Inelna hrang hranga vawi riat chak zawn chungin United-in an khel a, rin an hlawh zawk hle. Mahse, Burnley-in khawng takin goal an veng a, second half-ah hlauhawm takin an nawr thei a, minute 51-ah Ashley Barnes chuan a chhuih lut.

Mikhual Burnley-in an khung belh leh a, minute 81-ah Barnes-a siamsak atangin Chris Wood chuan a tauh lut a, si hnih faiin hma an hruai.

Manager lailawk Ole Gunnar Solskjaer-a hnuaiah a vawi khat nan United an tlawm teuh hle a, nasa takin an nawr zui a, Jeff Hendrick chuan Jesse Lingard pawt tluin penalty a chawi.

Minute 87-ah Paul Pogba chuan penalty pet lutin mualneitu team tan beiseina a siamsak a, minute 90 hnuah Alexis Sanchez chuan tha takin a tauh a, Burnley goalkeeper Tom Heaton chuan dansak mah se Victor Lindelof chuan ball per let changin an si phurh sut nan a khung a, a vawi khat nan Solskjear-a hnuaiah United-in point an hloh a ni.

Arsenal-in United an kalsak ve thung a, 2-1 in an mikhual Cardiff an hneh a ni. Arsenal-in first half chhungin su tlang zo lo mah se second half-ah Pierre-Emerick Aubameyang leh Alexandre Lacazet chuan an khung a, tun hnaia an harsatna an su kiang.

Cardiff player Bruno Ecuele Manga chuan penalty a chawi a, minute 66-ah Aubameyang chuan pet lutin league kal meka vawi 15 a khungna hmangin Gunners-in hma an hruai.

Minute 83-ah Lacazet chuan Arsenal hmahruaina tichhahin a pet lut ve leh a, Cardiff-in bei letin minute 90 hnuah substitute Nathaniel Mendez-Laing chuan si khat sut then mah se awmzia a nei tam lo va, pangana Arsenal-in Chelsea nih rualin point hnihin United aiin an sang zui bawk a ni.

Chelsea-in Bonmouth tlawhin zanin dar 1:15 atangin an khel ve thung dawn a, hmahruaitu Liverpool-in Leicester mikhualin pathumna Tottenham-in Watford an mikhual dawn bawk a, dar 1:30 atangin an khel tan ve thung ang.

Share post:
avatar
  Subscribe  
Notify of