Malaysian MotoGP inbuatsaihnaah Rins a tlan chak

Malaysian MotoGP inbuatsaihnaah Rins a tlan chak

LUNGLEN SPORTS
Zirtawpniah Malaysian MotoGP inbuatsaihna hun vawi hnih an hmang a, a vawi khatnaa chak ber Andrea Dovizioso khumin chaw hnuah Suzuki rider Alex Rins a tlan chak ber.

Darkar hnih chhung hun an nei a, inpuahchah thawh hnihnaah hian world champion Marc Marquez chuan a tir atanga a chanve aia tam thlengin a tlan chak ber.

A hnuah Rins chuan chhinchhiahtlak takin Suzuki bike a khalh a, chaw hma lama chak ber Ducati rider Dovizioso aia chak zawkin a tlan kual a, inbuatsaih vawi hnihnaa chak ber a nih bakah zirtawpnia tlan chak ber a ni tel bawk.

An tlan hnuhnun ber Australia-a harsatna tawk Marquez chu tlan chak pahnihna a ni a, Repsol Honda chhuanvawr hian kuminah world title la fel tawh mah se tlan tur pahnih an la neihah a tha thei ang bera season khar ngei a duh a ni.

Inbuatsaih vawi hnihnaah hian Pramac Ducati rider pahnih an che tha a, Jack Miller chu tlan chak pathumna niin a teammate Danilo Petrucci chu panganaah a awm bawk.

Chawlhni kal ta khan Yamaha-in an harsatna lian tak su kiangin Phillip Island-ah Maverick Vinales a chak ber a, vawi 25 chak ni hmel an hmuh loh zawn hnua Yamaha factory team-in dawhsan chung ber an luah leh hmasak ber a ni.

Yamaha-in beiseina sang tak nen Malaysia an pan a, Vinales chu zirtawpni chaw hnu inbuatsaihnaah tlan chak palina a ni a, a teammate Valentino Rossi chu paruknaah a awm.

Sepang tlankawngah inrinni chhun dar 1:40 atangin qualifying an tlan dawn a, chawlhni chhun dar 1:30 atangin intlansiak an tan ang.

Championship kal mekah Marquez chuan point 296 hmuin world champion a nih tawh bakah fal takin hma a hruai a, pahnihnaah Dovizioso awmin point 86-in Markez a pha lo va, a pumpuiah Rossi chu pathumna niin a teammate Vinales chu palinaah a awm ve mek bawk a ni.

Share post:
avatar
  Subscribe  
Notify of