LUNGLEN SPECIAL: Mizoram medical college hmasaber MIMER chanchin

August 13-ah MIMER-ah class tan a ni dawn, ram pawn zirlai pasarih nei dawn

Mizoramin Medical college a neih hmasak ber Seat 100 awmna, Mizoram institute of Medical Education & Research (MIMER) Falkawn a mi chu vawiin khan chief minister Lal Thanhawla chuan a hawng ta. MIMER ah hian Mizoram in seat 70 a nei a, seat 15 chu india ram state dangte tan niin, 15 dang chu India ram pawn lama awm Non Resident India (NRI) tana dah a ni.

  • Hawnna inkhawmah hian Mizoram sorkar health department hnuaia lo thawk tawh leh sorkar mi pawimawh mi 1500 bawr vel sawm an ni a, ruai nen ropui takin a lawmna hun hman a ni.
  • Seat 100 awmna MIMER-ah hian MBBS zirna First yearah subject 3 hawn a ni dawn a, second yearah subject 5 hawn tur niin hawn belh zel tura ruahman a ni. MIMER-ah hian Faculty 91 lak tawh niin Mizoram pawn atangin mi 7 lak an ni tawh a, mi 12 chu Non teaching staff tur an ni a, Faculty hi lakbelh mek zel a ni.
  • MIMER hi Medical Council of India-in a pawm hnuah sorkar laipuia Health & Family Welfare Ministry chuan kumin May ni 22 khan pawmpui ve lehin Medical College din phalna, Letter of Permission a tichhuak a ni.

MIMER dinna hmun State Referral Hospital hi kum 1996-a khatih laia India Prime Minister HD. Deve Gowda-an Mizoram a lo tlawh tuma Mizoram Sorkar-in a ngen anga din a ni a, tunah hian khum 159 a awm mek a ni. www.lunglen.com Falkawn-a State Referral Hospital-ah hian Medical College din a nih theih nan Mizoram Sorkar chuan kawng hrang hrangin hma a lo la tawh thin a, June ni 9, 2013 khan Medical College din tura inrawnkhawmna hmasa ber neih niin, hmalakna kal zelah College din tur hming atan Mizoram Institute of Medical Education and Research (MIMER) tih pawm a ni.

Medical College din tura Mizoram Sorkar hmalakna hi Sorkar laipui chuan January ni 2, 2014 khan a pawmpui a, hemi atan phalna chu February ni 19, 2014 khan khatih laia Union Health and Family Welfare Ministry-a Jt. Secretary, Dr. Vishwas Mehta-in Mizoram sorkar a hriattir angin, Sorkar laipui leh Mizoram Sorkar chuan Medical College dinna atan inremna chu May 16, 2014 khan an siam a. www.lunglen.com He inremna ang hian State Referral Hospital tihchangtlun nan cheng vbc. 189 ruahman niin, Mizoram sorkar chuan 2016-17 khan NEDP hnuaiah damdawi In tihchangtlunna atan cheng vbc. 28 a dah bakah 2017-18 atan cheng vbc. 15 a dah bawk.

MCI-in inkaihhruaina dan a siam ang chuan Medical College behchhan tur damdawi In-a nitina inentir chu a tlem berah mi 400 an tlin a ngai a, Medical College din a nih atanga kum 1 chhungin zirtirtu 104 an tlin a ngaih bakah kum 4-na atangin mi 168 an tlin a ngai a, hnathawktu dang zawng zawng nena Staff mamawh zat chu a tlem berah mi 629 an tlin a ngai.

College din phalna hi kum 2014 atang khan kum tin Medical Council of India-ah dil a ni a. Kum 2014 leh 2015-a dilna chu MCI hian a hnawl a, 2016 khan dil nawn leh niin, hei hi pawm a nih hnuah nikum Jan. 5-6 ah rawn endikin, tehna thenkhata a tlin loh avangin sorkar laipuia Health & Family Welfare Ministry chuan phalna a pe theilo a, hemi hnu kumin May 22 khan Medical College din phalna, Letter of Permission a rawn tichhuak ta a ni.

MIMER-ah hian a bul tan nan subject 3 – Anatomy, Physiology leh Bio­chemistry-ahte class tan a ni dawn a, MIMER-a lut turte chu NEET paltlangte chauh an ni ang a, MIMER atan hian kum khatah cheng vbc. 40-50 vel Mizoram sorkar chuan a sen a ngai dawn ni a ngaih a ni.

MIMER CHANCHIN

  • June ni 9, 2013 khan Medical College din tura inrawnkhawmna hmasa ber neih a ni.
  • Hmalakna kal zelah College din tur hming atan Mizoram Institute of Medical Education and Research (MIMER) tih pawm a ni.
  • Medical College din tura Mizoram sorkar hmalakna hi sorkar laipui in January ni 2, 2014 ah a pawmpui. www.lunglen.com
  • Ministry of Health & Family Welfare-in March 3, 2014 khan Mizoram sorkar hnenah medical college din phalna a rawn hriattir.
  • Sorkar laipui leh Mizoram sorkar chuan Medical College dinna atan inremna May 16, 2014 ah an siam.
  • MCI lamin tum thum an rawn endik a, a vawi thumna, April 4, 2018-a an endik leh hnuah an pawm.
  • Sorkar laipuia Health & Family Welfare Ministry chuan kumin May ni 22 khan Medical College din phalna, Letter of Permission a tichhuak.
  • August 7, 2018 ah Seat 100 awmna Mizoram a Medical College hmasa ber CM Lal Thanhawlan a hawng.
Share post:
avatar
  Subscribe  
Notify of