LUNGLEIAH MNF CAMPAIGN DIRACTORATE: MNF hi a piangthar tawh

LUNGLEIAH MNF CAMPAIGN DIRACTORATE: MNF hi a piangthar tawh

LUNGLEN BUREAU
Aizawl, September 28, 2018
MNF Sub-Hqrs., Lunglei Mizo Hnam Runah MLA Election lo awm tura General Headquarters, Sub Hqrs, District Hqrs tina mumal leh tha zawka inthlan kalpui a nih theihna tura Campaign Directorate din chu vawiin khan R.Tlanghmingthanga, MNF Vice President chuan Sub Hqrs Area-a Campaign Directorate member-ten hna an tan nghal theih turin ‘Kick Off’ hun a hmanpui a. Thu sawiin, “MNF hi kan piangthar tawh a, hruaitu zawng zawngte Minister emaw, MLA emaw nih kan tum vek khan harsatna min siam a ni,” tiin kuminah hian amah pawh inthlan chuh a tum tawh loh thu a sawi.

R.Tlanghmingthanga chuan, “Hun hmasaah khan kan tih tur ngei ngei ni si, kan hriat loh avanga kan tih loh te, kan Hnam sipai, martarte chhungkua kan lo hriat tawk loh avangin kan member eng emaw zat chu lungawi lovin kan siam a ni,” tiin pawi an tih thu leh ngaihdam a dil tih a sawi a. “Tunah chuan MNF hi a piangthar tawh a; chuvangin, inthlanah hian party office atanga kan Minister leh MLA te kal dan tur lo enpuitu tur kan awm hi a tul a ni tiin kan hotuten ngaihtuahna tha tak mai an duang chhuak,” a ti.

Health Minister hlui, R.Tlanghmingthanga chuan inthlan lo awm turah hian Pathian duh zawnga ram kaihhruai tum, MNF leh an Pathian leh Kohhran bakah NGO-te hmusittu, Congress party an inbei dawn tih sawiin, “Keini chuan kan innghahna, ‘Thenkhatten Tawlailirte hmang mah sela, keini erawh chuan Lalpa kan Pathian hming kan lam zawk ang’ tih hi hre reng ila, hnehna chang ngei turin mahni hmazawn theuhvah theitawp kan chhuah a tul a ni,” a ti.

Campaign Directorate Kick Off hi F.Lalsawmkima, MNF Sub-Hqrs Vice President-in a kaihruai a, T.C.Pachhunga, General Secretary pawhin thu a sawi a. Chawhnuah Campaign Directorate member-te hi Samson Zoramthanga in, Lunglei Chanmariah a vawi khat nan an thukhawm nghal bawk.

Share post:
avatar
  Subscribe  
Notify of