Lungleiah khawpui enkawlna Municipal Council kan pe dawn: Lalruatkima, MLA

Lungleiah khawpui enkawlna Municipal Council kan pe dawn: Lalruatkima, MLA

LUNGLEN BUREAU
Aizawl Oct 31, 2018
Nimin khan Lunglei Farm Veng Community Hall-ah MNF – Lunglei East Block-I Conference neih a ni a. Khuallian Best Legislator MLA Lalruatkima chuan MNF Sorkar hmalakna tur leh Lunglei district hmasawnna tur tlangpui a sawi a. “Lungleiah khawpui enkawlna Municipal Council kan pe dawn,” a ti.

Lunglei East Block-I Conference khuallian, Aizawl West II MLA Lalruatkima chuan MNF party-ah mi thar 436 a lawmlut nghal a. Heng zingah hian Lunglei MJA President H.Lalthansanga leh Vice President K.Lalrintluanga an tel bawk a ni.

MLA Lalruatkima chuan thusawiin, Aizawl – Lunglei kawng chhe lutuk chu MNF Sorkar tharah chuan darkar 4 kalah siam a nih leh tur thu a sawi a. Tlawng kawng chhia pawh, an sum sen ngaihtuahin mipui harsatna a kiam lo chu mak a tiin, “Mi ramah chuan sumin kawng an siam a, Congress Sorkarah chuan kawngin sum an siam,” a ti a. Kawng chhia vanga Zoram mang chhia chu tihbo a nih tur thu a sawi bawk.

Mizoram inthlan lo awm tawha Congress Party-in manifesto a dah changchang sawiin – decentralization, adminisatration mumal, development mumal a awm theih nan Lungleiah Southern Divisional Hqrs dah an tum thu leh Cabinet meeting pawh neih thin an tum tun thlengin tihpuitlin a ni lo a ti.

Lalruatkima chuan April 1, 2010-a Lungsei South MLA-in Assembly House-a a putluh thusawiin – Chhimbial mipuite harsatna sutkian a nih theih nan airfield laih nan Central-ah nawr ni rawh se, tih chu April Fool ni kher a nih avangin mipui min bum fai vek, a ti a. A hnu lawkah Lunglei bula airport a siam theih loh thu an sawi zui leh, a ti bawk.

Lungleia municipal din tum changchangah Aizawl West-II MLA chuan – August 2, 2016 khan UD&PA Minister-in Aizawla AMRUT Scheme a hawnnaah Mizoram sorkarin district danga municipal din tura ngaihtuahna a sen mek thu bakah Planning leh Finance Deptt nen inrawn mek a nih thu a sawi a. Tin, Sept 13, 2016 khan Lunglei Chhimbial Chhantu OB Meeting chuan Lunglei Municipal Council Steering Committee (LMCSC) Adhoc Body an din thusawiin, Sept 17, 2016 khan CM Pu Hawla hmuin Lungleia Municipal Council din dan tur an sawipui, a ti bawk.

Chief Minister-in a chhannaah chuan Lungleia Municipal Council din turin Mizoram sorkar a inpeih tawh tih a nih laiin, tun dinhmun thlengin Lungleiah municipal hmuh tur a la awm lo tiin, Lalruatkima chuan, “Municipal Council kan nei dawn. District Hqrs hrang hrangah pawh kan pe dawn,” a ti.

MNF Sorkar tharah chuan langtlang sorkar a piang dawn tih Pu Ruatkima chuan a sawi a, “Kan hnathawhte chu a thain a tlo tur a ni a, a mawi bawk tur a ni. Kan inelna tur chu hlep tam ni lovin, hnathawh that a ni zawk ang,” a ti a. Official-te pawhin MNF-te hnathawh chu a tha bik an tih tur thu a sawi bawk.

MNF MLA chuan nakin lawkah Congress hruaitu thenkhatin MNF an zawm leh tur thu tun Thawhtanni zan mai khan an tihfel thu a sawi a. Kumin September thla atanga Congress Party chhiat chhoh dan mek chhan chu Congress lal chhungkua vang a ni, a ti a. An party nomination an neih hma zanah CM leh super minister an tihte bakah minister pahnihten meeting an nei hmasa a, a tukah an rel ang chiahin a lo chhuak, a ti bawk.

Congress chuan candidate an in-set kim thei lo a, tun thlengin manifesto pawh an la nei lo, a ti a. Lal chhungkaw induhsakna avangin an chuanna lawng a pil mek a, sahimna zawngin MNF party-ah an luh hum hum thu Ruatkima chuan a sawi bawk a ni.

MNF Lunglei East Block-I Conference hi Block President F.Lalsangliana’n a kaihruai a, martarte sunna hun hman a ni a, Block Secretary H.Lalawmpuia’n report a pe a. Khuall zahawm leh Lunglei East-a ding tur MNF Official Candidate Lawmawma Tochhawng chuan thusawina hun a hmang a, lawm luh tharte pawhin thutawi an sawi bawk a ni.

Share post:
avatar
  Subscribe  
Notify of