Lunglei khawpui chhung tan in sak tanpuina scheme hawng, a dawng turin chhungkaw 792 thlang

Lunglei khawpui chhung tan in sak tanpuina scheme hawng, a dawng turin chhungkaw 792 thlang

LUNGLEN BUREAU
Aizawl, October 4, 2018
Lunglei West bialtu MLA Chalrosanga Ralte chuan in nei lote tana in sak tanpuina scheme, Pradhan Mantri Awas Yojana (PMAY) – Housing For All (Urban) chu Lunglei khawpui chhunga hman turin vawiin khan Convention Centre-ah a hawng a. Lunglei khawpui chhungah hian he in sak tanpuina hi chhungkaw 792-in dawng tura thlan chhuah an ni.

Chalrosanga Ralte chuan Lunglei khawpuia in sak tanpuina dawngtu tur chhungkuate chuan a nihna tur ang taka hmang turin a chahin, “Ram hmasawnna kawngah sorkar a tang a, mipuite pawhin tan kan lak ve a tul,” tiin tanpuina dawnah duhtawk mai lova tih tur leh mawhphurhna an neih vete hlen chhuak turin kalkhawmte a chah.

Pradhan Mantri Awas Yojana (PMAY)-Housing for All (HFA) 2022 Mission hi June, 2015-a puan a nih atangin Mizoramah pawh hmalak a ni a. Awmze nei leh tha zawka a kal theih beiseiin state sorkarin District Screening Commitee a din a. PMAY-HFA Beneficiary Led-Construction (BLC) component hnuaia dilna thehluttute chu chenna in ngeia kal chilh niin endik an nih hnuah dawng tur hi thlan an ni.

Scheme hnuaiah hian a dawngtute hian Rs. 1,50,000/- theuh an dawng dawn a. Tanpuina hi installment 3-a pek tur niin a dawngtuten anmahni sum senga foundation khur laih leh insakna tur hmun laih zawl ngaite an laih hnuah 1st Installment atan 40% (Rs 60,000/-) pek a ni ang a, 2nd installment chu in sak tur foundation leh structure leh bang pin hna an thawh zawh hnuah 40% pek leh an ni ang a, in sak zawh tawh hnuah department-in en dikin completion certificate tihchhuah hnuah 3rd installment-ah 20% (Rs. 30,000/-) pek an ni leh ang.

Pawisa hi bank account kaltlanga pek tura ruahman a ni a, pawisa pek tawh hman danah department-in ruahmanna siampuiin a hna viltu department thawktute hriatpuina tel lovin pawisa hi lak theih a ni dawn lo va. In sakna hmanraw that dan inang tlanga a nih theih nan leh market price sang thut tur ven nan lei dan tur ruahmanpui bawk an ni ang.

Share post:
avatar
  Subscribe  
Notify of