Lo neituten lkalphung hlui kan la hman avangin kan hlawk tur angin kan hlawk pha lo : Lalsawta

Lo neituten lkalphung hlui kan la hman avangin kan hlawk tur angin kan hlawk pha lo : Lalsawta

LUNGLEN BUREAU
Aizawl, September 24, 2018
Finance Minister Lalsawta chuan, “Mizorama lo neitute hian lo neih dan kalphung hlui kan la hman reng avangin kan hlawk tur angin kan la hlawk pha lo,” a ti a. “Ram mipuiten ei leh bar kan mamawh atanga 70% chu ram pawn atanga lakluh a nih avangin hmasawnna tur tam tak kan la bak a ni,” a ti bawk.

Vawiina ICAR-Research Complex for NEH Region, Mizoram Centre, Kolasib buatsaiha Aijal Club-a Mizoram sorkar hnuaia Agriculture kaihhnawih department hrang hrang telna, Interface meeting on Adaptation Potential of Agricultural Technologies for Doubling Farmers’ Income in Mizoram neihah khuallian, Lalsawta chuan publication 5 a tlangzarh nghal a. Thu sawiin lo neih dan kalphung hlui chu thiamna thar leh khawl tha zawk hmanga thlak a ngaih thu leh chu chuan hlawk zawka thar chhuah kawngah lo neitute a puih bakah lo neitute a chawisan ngei a rin thu a sawi bawk.

Khuallian chuan hmasawn zel tur chuan ram chhung leh pawn atangin investor-te hip luh a hun tawh tih sawiin, “Magnetic Mizoram hmangin kawng hrang hrangah investor-te nen hmalak mek a ni a, agriculture-ah pawh chutianga hmalak chu a hun ve tawh a ni,” a ti. Sorkar laipuiin kum 2022 hmaa lo neitute hlawkna a leta a pun theih nana hmalakna tihpuitlin a nih theih nan hma laa tan lakpuiah a sawm bawk.

P.C.Lalthanliana, Horticulture Minister chu Khual Zahawm niin ICAR leh department hrang hrang hotute nena tangruala hetiang inhmuhkhawmna leh sawihona hun pawimawh an buatsaih thei chu lawmawm a tih a thu sawi a, Zoram mipuite tana chhawrtlak leh hmantlak zawk rah chhuah a awm ngei a beisei thu a sawi bawk. Lo neituten hlawk zawka an thar chhuah theih nan technology thar nena hmalak a pawimawh thu a sawi bawk.

Meeting hi Dr. N.Prakash, Director, ICAR Research Complex for NEH Region, Umiam, Meghalaya-in a kaihruaia, kuthnathawktute chawisang turin agriculture lama thiamna tharte hman tangkai a pawimawhzia sawiin department hrang hrangte leh ICAR mi thiamte thawhho tulzia a sawi a. Lalhmingthanga, Commissioner and Secretary, Agri & RD Department leh Dr. I.Shakuntala, Joint Director, ICAR Research Complex for NEH Region, Mizoram Centre, Kolasib te pawhin thu an sawi.

Mizoram sorkar hnuaia Agriculture, AH & Vety, Fisheries, Horticulture, Soil & Water, Minor irrigation, Sericulture, Commerce & Industries department aiawhte leh College of Veterinary Science, Selesih leh department dang atanga Secretary leh Director te an tel a, Mizoramin agriculture lama kan harsatna leh hma lak a nih theih dan sawihona hun an hmang.

Share post:
avatar
  Subscribe  
Notify of