Lawngtlaiah HSS zirlaite hnenah vaihlo leh ruihhlo that lohzia leh faina zirtir

Auto Draft 13

LUNGLEN BUREAU
Aizawl, August 31, 2018
National Tobacco Control Programme (NTCP), Lawngtlai district huaihawtin NEDP hma lakna hnuaiah vawiin khan Lawngtlaia Govt. Region Higher Secondary School zirlaite hnenah vaihlo leh ruihhlo that lohzia zirtirna hun hman a ni a. Swachh Bharat Mission (Urban) hnuaia Lawngtlai khawpui faina awareness campaign sub-committee chuan fai inzirtirna hun an hmang ve nghal bawk.

He hun hi Lawngtlai District RMSA Dy. DPC H.Vanlaltanpuia’n a kaihruai a. NTCP Lawngtlai atangin Social Worker H.Vanlalmuansangi’n powerpoint presentation hmangin vaihlo leh ruihhlovin mihring hriselna a tihchhiat theih dan leh a nghawng tha lo dangte a tar lang a. Zirlaite chu ruihhlo leh vaihlo laka inthiar fihlim tlat turin a chah.

Faina awareness campaign sub-committee atangin LADC Education Department-a Circle Officer Vanlalhnema chuan faina pawimawhzia a sawi a. Lawngtlai khawpui chu Mizorama khawpui fai bera siam tura mawh phur lian ber leh thawh hlawk ber tur chu zirlaite an nih thu sawiin, zirlai kal khawmte chu anmahni invawng fai a, fai tura mi dang zirtirtu nih tum theuh turin a chah nghal.

Vawiina hun hman hi NEDP hnuaia hma lakna, ruihhlo leh vaihlo laka zirlaite an fihlim theihna tura beihpui thlak kal zel niin, Mizoram Khawpui Fai Inelna 2018 kal chho mek atana hma lakna peng pakhat, ‘fai inzirtirna’ nen hun khata hman a ni.

NTCP hian NEDP early intervention mobile campaign for school hnuaiah Lawngtlai district-a block hrang hranga sikulahte hun an lo hmang tawh a. Lawngtlai block-ah chuan sikul 14-ah kal tawhin, vawiin kha a tawpna ber a ni a. A khar nan hian vawiin vek khan Don Bosco School-ah Lawngtlai khawpui chhunga sikul hrang hrang 7 atanga zirlai thlan bik 21-te tan ‘Ruihtheihthil, zuk leh hmuamin kan hriselna, chhungkua leh khawtlanga nghawng a neih dan’ tih thupui hmanga thu inziahsiak (essay writing competition) an buatsaih chhunzawm bawk.

Share post:
avatar
  Subscribe  
Notify of